Sulmuesi i KF Llapit, Valmir Veliu, është shumë pranë transferimit në elitën e futbollit turk, në Trabzonspor.
Veliu është në negociata me klubin turk Trabzonspor. Transferimin e tij është duke e negociuar agjenti i tij Rahman Kice, i cili ka edhe disa futbollistë të tjerë shqiptarë nën menagjim.
Veliu, 21-vjeçar, ka impresionuar trajnerin Abdullah Avcı dhe presidentin e klubit Ahmet Agaoglu, i cli ka dhënë dritën e gjelbër për të filluar blerjen e kartonit nga Llapi.
Në Transfermarkt, Veliu, i cili u përzgjodh në formacionin e vitit nga Federata e Futbollit të Kosovës, ka vlerën e tregut prej 400 mijë eurosh dhe mësohet se Trabzonspori, i cili me shumë gjasa do të kualifikohet në Ligën e Kampionëve sezonin e ardhshëm, është gati të bëjë këtë investim.
Sipas agjentit të tij Kice mësohet se Veliu ishte duke e negociuar transferimin e tij në klubin më të madh turk, Galatasaray por largimi i trajnerit legjendar, Fatih Terim, ka ndryshuar situatën totalisht.
“Veliu ishte duke u transferuar në Galatasaray por largimi i trajnerit Fatih Terim ka ndryshuar planet. Jemi duke negociuar me Trabzonspor por edhe me disa ekipe të tjera. Ende nuk kemi vendosur asgjë, duke i shqyrtuar ofertat”.
Terim të hënën (dje) është larguar nga pozita e trajnerit për shkak të rezultateve të dobëta në kampionatin turk këtë sezon.
Reprezentuesi i Kosovës këtë sezon me Llapin ka zhvilluar 18 ndeshje duke shënuar gjashtë gola dhe duke asistuar gjashtë herë tjera në BKT Superligën e Kosovës.
Në elitën e futbollit turk, Veliu do t’iu bashkohet disa futbollistëve shqiptarë të cilët janë duke bërë karrierë tash e disa vite në Turqi.
