Gjykata Themelore e Pejës ka shpallur të pafajshëm Shaban Berishën, babain e deputetit Veton Berisha, i cili ishte arrestuar në dhjetor të 2023-ës nën dyshimet se kishte dhunuar një 23-vjeçare nga Shqipëria, e cila vuante nga problemet mendore.
Lajmin për vendimin e Gjykatës e ka bërë të ditur deputeti Veton Berisha, si dhe avokati Fanol Krasniqi.
Deputeti Berisha ka falënderuar avokatin Krasniqi për punën e tij, duke e cilësuar këtë periudhë 2 vjeqare si shumë të rëndë për familjen e tij.
“Faleminderit miku im i çmuar Avokat Fanol Krasniqi për profesionalizmin e treguar gjatë gjithë këtij procesi 2 vjeqar shumë të rëndë për mua, prindin tim dhe gjithë rrethin dhe familjen time! Pas çdo vështirësie vjen lehtësimi, drejtësia vonon por triumfon”, ka shkruar Berisha.
Ndërkaq avokati Fanol Krasniqi u shpreh se babi i deputetit Berisha ishte akuzuar padrejtësisht dhe se nuk është provuar asnjë fakt.
“Gjatë këtij procesi gjyqësor nuk është provuar asnjë fakt që ta lidhte z. Berisha me ndonjë vepër penale, por, është provuar vetëm fakti që arrestimi i tij nuk kishte asnjë bazë ligjore.
E vërteta është se z. Shaban Berisha nuk u arrestua sepse kishte kryer ndonjë vepër penale, por sepse është babai i deputetit Veton Berisha. Ky vendim i Gjykatës është një fitore e drejtësisë dhe dëshmi se e vërteta, sado që vonon, del në dritë”, ka shkruar avokati Krasniqi.
Postimi i plotë:
