Ish-ambasadori dhe drejtori i KIPRED, Lulzim Peci, ka reaguar fuqishëm ndaj deklaratës së Osmanit, duke e cilësuar si të pavërtetë pretendimin për zbatimin e marrëveshjes.
“Po të ishte zbatuar Marrëveshja e Uashingtonit, sot Kosova do të kishte gazin dhe do të bëhej nyje rajonale e shpërndarjes së tij drejt Shqipërisë veriore, Malit të Zi dhe Serbisë. Zyrtarët e Qeverisë Kurti në vitin 2021 e quanin atë gaz si ‘gaz rus’, ndonëse një pjesë e tij vinte nga SHBA-të në formë të lëngshme”, tha Peci.
Ai shtoi se edhe projekte të tjera të rëndësishme infrastrukturore si hekurudha Prishtinë-Durrës dhe menaxhimi i ujërave të Liqenit të Ujmanit janë lënë pas dore nga qeveria aktuale.
“Mos-zbatimi i kësaj marrëveshjeje është një nga gabimet më të mëdha gjeopolitike me pasoja afatgjate për Kosovën”, paralajmëroi Peci.
Deklaratës së presidentes i ka reaguar edhe Avdullah Hoti, ish-kryeministër dhe nënshkrues i Marrëveshjes së Uashingtonit, i cili e akuzoi Osmanin për hipokrizi dhe përvetësim politik.
“Marrëveshja që dikur e luftonte për vota, sot shërben për lavdi të rreme. Jo, ti dhe Kurti nuk e keni zbatuar këtë marrëveshje. Tani po mundoheni ta përvetësoni për shkak të ndryshimeve në politikën amerikane. Ky është kulmi i mashtrimit politik”, shkroi Hoti.
Ndryshe, marrëveshja e Uashingtonit ishte ndërmjetësuar nga administrata e ish-presidentit amerikan Donald Trump dhe përfshinte një sërë zotimesh ekonomike, përfshirë:
Zhvillimin e infrastrukturës hekurudhore dhe rrugore midis Prishtinës dhe Durrësit,
Menaxhimin e ujërave të Liqenit të Ujmanit me ndërmjetësimin e SHBA-ve,
Projekte për gazifikimin dhe rrjetet e energjisë, dhe
Angazhime për normalizim ekonomik midis Kosovës dhe Serbisë.
Qeveria Kurti në vitin 2021 kishte refuzuar një pjesë të këtyre projekteve, sidomos projektin e gazsjellësit, duke e quajtur “të dëmshëm dhe të panevojshëm”.
