Prokuroria Themelore në Prizren, pas një pune hetimore gjashtëmujore, në koordinim të plotë me policinë, ka ndaluar katër persona nën dyshimin për kryerje të veprës penale “Fajde”.
Aksioni është zhvilluar në tri lokacione të ndryshme, ku të pandehurit, gjatë aplikimit të masave të fshehta të vëzhgimit dhe hetimit, janë arrestuar në flagrancë.
Janë bastisur tetë lokacione dhe janë sekuestruar para, vetura, armë, telefona, laptopë, kompjuterë, kontrata, regjistra të ndryshëm dhe marrëveshje të nënshkruara mes të pandehurve dhe viktimave.
“Të njëjtit, duke vepruar veç e veç, dyshohet se kanë vepruar me dashje dhe me qëllim të përfitimit të kundërligjshëm të pasurisë për vete, duke kontraktuar shuma dukshëm jo proporcionale të pasurisë në këmbim të shërbimit (dhënies së borxhit), viktimave të fajdesë, nga të cilët shfrytëzojnë gjendjen e rënduar financiare, papërvojën e tyre dhe të njëjtëve u ofrojnë shuma të të hollave në formë të borxhit, që më pas i ngarkojnë me kamata të larta dhe të papërballueshme”, thuhet në njoftimin e prokurorisë.
Me aktvendim të prokurorit, të pandehurit janë ndaluar për 48 orë dhe brenda afatit ligjor do të paraqitet kërkesë për caktimin e masës së paraburgimit ndaj të njëjtëve.
