Në Gjilan të premten po protestohet kundër dhunës ndaj grave.
Rasti i një gruaje me probleme të shëndetit mendor, që dyshohet se u dhunua fizikisht e po ashtu u përdor seksualisht nga një person, ka nxitur protestën.
Kolektivi për Mendim dhe Veprim Feminist në njoftimin për protestën ka shkruar: “protestojmë kundër dhunës strukturore”, duke shtuar se rasti i gruas në Gjilan shpërfaqë probleme sistematike “që i dhunojnë dukshëm më shumë grupe të cilat skajohen, tjetërsohen dhe dehumanizohen nga shteti dhe shoqëria”.
“Përdhunimi dhe dhuna sistemike që është ushtruar mbi Adilen dhe të tjera gra i qet në shesh problemet strukturore mbi të cilat funksionon shteti dhe shoqëria jonë. Kornizimi i tyre si më pak jetë të vlefshme dhe institucionalizimi i tyre si rezultat i paaftësisë së shtetit, që lehtësisht autorizohet nga gjykatat për personat me probleme të shëndetit mendor, janë pjesë qenësore e dhunës patriarkale. Kësisoji, shteti na bën hisedarë në shtypje duke llogaritë në heshtjen tonë kundrejt abuzimeve që ne i shohim në baza ditore”, thuhet te njoftimi për protestën.
Policia ka konfirmuar arrestimin e të dyshuarit për veprën penale “dhunë në familje” lidhur me rastin e gruas.
