Banorë të pakënaqur nga komuna e Graçanicës, afër Prishtinës, për të dytën ditë me radhë kanë protestuar para institucioneve shëndetësore, që funksionojnë në sistemin e Serbisë, për shkak të “punësimeve partiake dhe familjare”, duke kërkuar anulimin e konkurseve dhe rishikimin e tyre.
Bëhet fjalë kryesisht për pozitat që janë shpallur nga Ministria e Shëndetësisë së Serbisë në fund të janarit, të cilat Lista Serbe – partia më e madhe e serbëve në Kosovë, që gëzon mbështetjen e Beogradit – i ka përmendur edhe gjatë fushatës për zgjedhjet parlamentare të Kosovës të mbajtura më 9 shkurt.
Duke theksuar se Lista Serbe është e vetmja parti që ka mbështetjen e shtetit serb, kryetari i saj, Zllatan Elek, ka deklaruar gjatë fushatës zgjedhore se “në të kaluarën, shteti i Serbisë ka siguruar një numër të madh të vendeve të punës dhe kjo është një nga mënyrat për të mbijetuar [në Kosovë]”.
Por, disa banorë të Graçanicës tani po pretendojnë se vendet e punës i kanë fituar ekskluzivisht personat e afërt me Listën Serbe, duke theksuar se përfaqësuesit lokalë u kishim premtuar vende pune “deri në momentin e fundit”, dhe se disa nga ata që janë punësuar, as që jetojnë në Kosovë.
Përndryshe, disa drejtues të institucioneve shëndetësore në zonat e banuara me serbë në Kosovë janë anëtarë të Listës Serbe. Për shembull, kryetari i kësaj partie, Zllatan Elek, është drejtor i Qendrës Klinike Spitalore në Mitrovicën e Veriut, ndërsa drejtoresha e Qendrës Shëndetësore në Graçanicë, Mirjana Dimitrijeviq, ka qenë në listën e kandidatëve për deputetë të kësaj partie për zgjedhjet e 9 shkurtit.
Gjatë protestës të mbajtur më 4 prill para Qendrës Shëndetësore në Uglar, në komunën e Graçanicës, disa nga qytetarët e pakënaqur u shprehën se kishin votuar për Partinë Progresive Serbe në zgjedhjet në Serbi dhe se tani shteti serb duhej t’i “mbrojë”.
“Ne të gjithë kemi votuar për presidentin tonë [presidentin e Serbisë, Aleksandar Vuçiq] dhe për Partinë Progresive Serbe. Mos lejoni që ata [Lista Serbe] të thonë se këta janë njerëz që kanë votuar kundër shtetit tonë… Presidenti ynë është Aleksandar Vuçiq, por për fat të keq ai po keqinformohet. E vërteta nuk po arrijnë tek ai”, tha Momo Jovanoviq, i cili mori pjesë në protestë.
Ai pohoi djalin e tij, i cili ka një kontratë pune me honorar, punëdhënësi e kishte “urdhëruar” në mesin e muajit mars që të shkonte në Parkun Pionier në Beograd, ku gjendet kampi i studentëve që po kundërshtojnë bllokadat e fakulteteve në Serbi nga studentët protestues. Radio Evropa e Lirë më 14 mars kishte raportuar për serbë nga Kosova që “jepnin mbështetje” për presidentin e Serbisë, Aleksandar Vuçiq. Në mesin e tyre u identifikuan edhe përfaqësues të Listës Serbe.
Një ditë më parë, para Qendrës Shëndetësore në Graçanicë, disa qytetarë të pakënaqur thanë se ata “e mbështesin Vuçiqin dhe shtetin e Serbisë”, por se nuk mund të “durojnë më” politikanët lokalë.
Ndër ta ishte edhe Sanja Aksiq, e cila tha se nuk është pranuar në punë sepse Ministria për Komunitete dhe Kthim e Kosovës po i ndërton një shtëpi. Në krye të kësaj ministrie, gjatë dy vjetëve të fundit, është Nenad Rashiq nga partia Për Liri, Drejtësi dhe Mbijetesë, i cili në zgjedhjet e fundit parlamentare fitoi një mandat në Kuvendin e Kosovës. Nëntë mandatet e tjera, të rezervuara për komunitetin serb, i mori Lista Serbe.
“Kjo është pafytyrësi”, tha Aksiq, duke theksuar se është nënë vetëushqyese.
Çfarë thonë autoritetet?
Drejtoresha e Qendrës Shëndetësore në Graçanicë, Mirjana Dimitrijeviq, tha se e kupton pakënaqësinë e qytetarëve, por se është e pamundur të pranohen në punë të gjithë të interesuarit.
“Qendra Shëndetësore në Graçanicë ka shpallur konkurs për 52 vende pune, për staf mjekësor dhe jomjekësor. Te ne kanë aplikuar 750 persona, dhe do të pranohen 52. Ajo që dua të theksoj është se e kuptoj pakënaqësinë, por nuk kemi mundësi të pranojmë një numër më të madh njerëzish”, tha ajo, duke shtuar se tani është afati i ankesave, të cilin mund ta shfrytëzojnë qytetarët e pakënaqur dhe të dorëzojnë vërejtjet e tyre.
Në përgjigje të pyetjes së gazetarëve për të komentuar akuzat për punësim partiak, Dimitrijeviq tha:
“Unë vërtet nuk mund të përgjigjem lidhur me këtë pyetje. Është formuar një komision dhe unë kam marr propozimin e këtij komisioni për kandidatët”.
Petar Gjorgjeviq nga Graçanica theksoi se numri i njerëzve që morën pjesë në protestë të premten ishte dukshëm më i vogël, pasi gjatë natës dhe mëngjesit të së premtes ka pasur ” kërcënime”. Ai nuk sqaroi saktësisht kush ka kërcënuar pjesëmarrësit e protestës apo ka bërë presion ndaj tyre.
“Unë i paralajmëroj të gjithë pjesëmarrësit e protestës që të dokumentojnë të gjitha kërcënimet që marrin përmes mesazheve zanore ose tekstuale dhe t’ia dorëzojnë ato policisë”, tha ai.
Ai gjithashtu paraqiti kërkesat e qytetarëve të pakënaqur, të cilat janë: të publikohet lista e punonjësve të pranuar dhe raporti i komisionit, të anulohet konkursi dhe të formohet një komision i ri dhe të pavarur, si dhe drejtuesit e institucioneve shëndetësore të japin dorëheqjen.
Gjorgjeviq njoftoi se protestat do të vazhdojnë, por theksoi se do të merret parasysh siguria e pjesëmarrësve.
Radio Evropa e Lirë iu drejtua Listës Serbe me kërkesën për të komentuar akuzat e qytetarëve për punësim partiak dhe presionet ndaj të cilëve ata ishin nënshtruar, por deri në publikimin e kësaj lajmi, nga ky subjekt politik nuk janë përgjigjur. As Ministria e Shëndetësisë e Qeverisë së Serbisë, e cila është përgjegjëse për institucionet shëndetësore në mjediset serbe në Kosovë, nuk ka dhënë përgjigje.
Përveç në Graçanicë, konkursi për vendet e punës në sektorin e shëndetësisë ishte hapur edhe në Mitrovicën e Veriut, Zubin Potok, Fushë, dhe në institucione të tjera që funksionojnë sipas sistemit të Serbisë.
Gjithashtu, Serbia ka premtuar ndihmë financiare për të papunët, duke ofruar mbështetje për 5.000 persona në shumën prej 20.000 dinarësh (rreth 170 euro), e cila u bë publike vitin e kaluar nga presidenti i Serbisë, Aleksandar Vuçiq.
Disa nga protestuesit në Graçanicë thanë se Lista Serbe ka përgatitur listat edhe për këtë lloj ndihme, duke shtuar se në to janë përfshirë “persona të përshtatshëm”.
Ndihma për serbët në Kosovë është paraparë përmes një vendimi të Qeverisë së Serbisë, që u ndërmor pas njoftimit të Vuçiqit shtatorin e vitit të kaluar, pas mbylljes së institucioneve në Kosovë, që funksiononin sipas sistemit të Serbisë. /REL
