Qeveria e Kosovës ka dalur me një njoftim mbi ecurinë e takimit në Bratisllavë të Sllovakisë, mes kryeministrit të Kosovës, Albin Kurti me Përfaqësuesin Special të Bashkimit Evropian për Dialogun Kosovë-Serbi dhe çështje të tjera rajonale të Ballkanit Perëndimor, Miroslav Lajçak, i cili po ashtu po merr pjesë në Forumin e Bratisllavës, GLOBSEC 2022.
Siç thuhet në kumtesë, në takimin pas panelit të diskutimit, kryeministri Kurti dhe Përfaqësuesi Special i BE-së, z. Lajçak folën për mbarëvajtjen e deritanishme të takimeve, rëndësinë komunikimit të rregullt dhe qasjes konstruktive përgjatë tërë procesit.
Me Lajçak, kryeministri ishte edhe pjesë e panelit të diskutimit ”Tani ose kurrë – Duke zhbllokuar të ardhmen evropiane për Ballkanin Perëndimor”, në të cilin foli për procesin e dialogun, parimet, vlerat dhe synimin e qartë të tij, e që është marrëveshja që në qendër ka njohjen reciproke.
