Klubi i Lirisë ka njoftuar se deri më tani pronari i klubit, Rahman Kiçe, është larguar nga kjo pozitë, për të lejuar riorganizim të klubit.
Kiçe tha se shpejt do të dihet pronari i ri, si dhe aksionarët e Bordit të FC Liria.
“Nga sot (e martë) nuk jam më pronar i FC Liria. Pronari i ri dhe aksionarët e rinj, bashkë me Bordin e ri të klubit, do të bëhen publik shumë shpejt”, ka thënë ai për faqen e klubit, duke mos dashur të zbuloj emra.
Ai ka falenderuar të gjithë me radhë me të cilët punoi, për më shumë se dy vite.
“Falenderoj Komunën, bashkëpunëtorët, tifozët Arpagjik’t dhe opinionin e gjerë prizrenas, për punë e bërë dhe përkrahjen. Nga sot Liria ka një tifoz-arpagjik më të fortë”, ka thënë ai, duke pohuar që Lirinë, do ta ketë në zemër dhe do ta ndihmojë edhe në të ardhmen, në forma të tjera.
Kiçe kishte fituar në Thirrjen Publike të Komisionit 6-të anëtarësh të Klubit, në prill 2022, duke marrë klubin në pronësi. Nga ajo kohë i ndihnuar dhe nga Komuna e Prizrenit dhe me përkrahjen e gjerë qytetare, Liria arriti që në stinorin 2023-2024 të rikthehet në Superligë.
Por, kjo zgjati vetëm një vit, pasi Liria sërish ra nga elita e futbollit kosovar.
Lidhur me të ardhmen e FC Liria, ish pronari Rahman Kiçe tha: “Ata që nga tani e tutje, të cilët e morën klubin në pronësi, janë ambicioz dhe pres që ta rikthejnë Lirinë aty ku e meriton, në Superligë”. /Gazeta Enigma
