Raportimet për bomba të vendosura, të dërguara mëngjesin e sotëm me e-mail në adresat e 115 shkollave fillore dhe të mesme në Beograd, ishin të rreme, konfirmoi Ministria e Punëve të Brendshme serbe.
Policia ka kryer kontrolle antisabotuese në të gjitha shkollat, pas së cilës u konstatua se në shkolla nuk kishte mjete shpërthyese dhe se raportimet ishin të rreme.
Mëngjesin e sotëm, pas lajmeve të para për bombat e vendosura, Ministria e Arsimit vendosi të evakuojë nxënësit dhe punonjësit e shkollave, turni i parë u ndërpre deri në përfundim të kontrollit dhe mësimi u organizua në distancë.
Vrasje masive në shkollën Vladislav Ribnikar
Kërcënimet për bombë erdhën dy javë pas vrasjes masive të fundit në shkollën fillore Vladislav Ribnikar, duke nxitur vëmendje shtesë pasi policia dërgoi ekipe të specializuara në shkolla për të hetuar rastin.
Në shkollën fillore të Beogradit, më 3 maj, një nxënës 13-vjeçar vrau tetë shokë të shkollës dhe një roje me armën e babait të tij dhe plagosi gjashtë të tjerë dhe një mësues. Një nga vajzat e plagosura ka ndërruar jetë më 15 maj.
Masakra pranë Mlladenovcit
Një ditë më vonë, në tre fshatra afër Mlladenovcit, një 21-vjeçar vrau tetë persona kryesisht të rinj me armë automatike dhe pistoletë dhe plagosi 14. Të dy autorët u arrestuan, vrasësi nga Mlladenoci pranoi krimin dhe si 13-vjeçar nuk mund të mbajë përgjegjësi penale me ligj. Edhe baballarët e të dy vrasësve u arrestuan dhe u lanë në paraburgim.
Që nga 8 maji në Serbi ka filluar një operacion për dorëzimin e armëve ilegale, pa dëshmi të origjinës dhe pa përgjegjësi penale, dhe deri të martën në mbrëmje rreth 20 mijë copë armë të ndryshme dhe rreth një milion copë municion të kalibrave të ndryshëm dhe lëndë shpërthyese janë dorëzuar.
