Ministria e Drejtësisë, Albulena Haxhiu, ka thënë se për dallim nga herëve të tjera Kosova nuk është kritikuar nga Raporti i Progresit për ndërhyrje politike në sistemin e drejtësisë
Pas pranimit të Raportit të Progresit, ministrja e Drejtësisë, Albulena Haxhiu, e ka komentuar duke thënë se “për dallim nga raportet e viteve të tjera, në Raportin për vendin të publikuar dje, Kosova nuk kritikohet për ndërhyrjet politike në sistemin e drejtësisë”.
Përveç pikave pozitive, Haxhiu ka folur edhe për ato negative siç është ngecja apo funksionimi i ngadaltë i sistemit të drejtësisë.
“Raporti evidenton ngecje në sistemin e drejtësisë sidomos me funksionimin e ngadaltë dhe me mungesën e rezultateve te rastet e korrupsionit të lartë”, ka thënë ajo.
Tutje, Haxhiu ka folur edhe për “reformat e nisura” të cilat sipas saj do të garantojnë suksese dhe pavarësi të sistemit gjyqësor.
“Reformat që kemi nisur, do të garantojnë sistem të pavarur, efikas e funksional të drejtësisë. Ndryshimet ligjore që i kemi bërë dhe mekanizmat që do të themelohen do të garantojnë luftim të korrupsionit e krimit të organizuar”, ka thënë ajo.
Kritika por edhe vlerësime përmban Raporti i Progresit për Kosovën i hartuar nga Komisioni Evropian për sivjet, i cili pritet të miratohet të mërkurën.
Përmbajtjen e këtij drafti aktual e ka raportuar Evropa e Lirë, sipas të cilit, Kosova vlerësohet se ka bërë disa përparime.
Mirëpo në shumicën e rasteve progresi thuhet se ka qenë i kufizuar dhe se nevojitet më shumë punë.
Në këtë draft, Kosova vlerësohet për përshtatjen e qëndrimeve të saj me BE-në sa i përket agresionit ushtarak të Rusisë ndaj Ukrainës.
Komisioni Evropian edhe sivjet përsërit qëndrimin se Kosova ka përmbushur të gjitha kriteret për liberalizimin e vizave. Mirëpo kësaj radhe, në dokument theksohet se ekziston një ndjenjë që Këshilli i BE-së të merret me urgjencë me çështjen e vizave.
Pashmangshëm në draftin e raportit i është bërë vend edhe dialogut për normalizimin e marrëdhënieve ndërmjet Kosovës dhe Serbisë.
Aty përmenden takimet e rregullta mes kryenegociatorëve dhe ai i 18 gushtit ndërmjet dy liderëve. Pajtimi për udhërrëfyesin e zbatimit të marrëveshjeve të energjisë dhe për udhëtimin vetëm me letërnjoftime janë pjesë e draftit po ashtu.
Megjithatë nga të dyja vendet kërkohet urgjentisht arritja e marrëveshjes gjithëpërfshirëse për normalizimin e marrëdhënieve (Duklagjini).
