Në media është dhënë paralajmërimi për shtrenjtimin e sërishëm të rrymës.
Lidhur me këtë ka reaguar opozita në Kosovë. Deputetja e LDK-së, Hykmete Bajrami e pyeti kryeministrin Albin Kurti se ku është problemi, derisa kërkoi garanci nga ai se çmimi i rrymës nuk do të ngritet përsëri.
“Dje në media u raportua se KESCO, kompania e faturimit, ka bërë kërkesë për shqyrtimin e jashtëzakonshëm të tarifave. Po fillon edhe një proces tjetër, edhe një cikël tjetër i ngritjes së çmimit të energjisë elektrike”, tha ajo.
“Ne ka disa muaj që e kemi ngritur çështjen që në vjeshtë ndoshta do të përballemi me një krizë energjetike, por t’ju themi të drejtën as ne nuk e kemi pritur që pikërisht tani, në korrik, të përballemi me një gjë të tillë”, theksoi Bajrami.
Ajo i kërkoi kryeministrit që t’i garantojë qytetarët se nuk do të ketë sërish shtrenjtim të rrymës.
“Edhe një ngritje tjetër në faturat e energjisë elekrike do t’i gjunjëzonte qytetarët dhe bizneset”, tha Bajrami.
