Shërbimi i sigurisë së brendshme të Estonisë njoftoi se një dron i lëshuar nga Rusia ka goditur oxhakun e një termocentrali në verilindje të Estonisë, shkruan Estonianworld.com, transmeton Gazeta Enigma.
Një dron i lëshuar nga Rusia goditi oxhakun e një termocentrali në Estoni, njoftoi të mërkurën në mëngjes shërbimi i sigurisë së brendshme i vendit, sipas Euronews, transmeton KosovaPress.“Një dron goditi oxhakun e termocentralit në Auvere. Askush nuk u lëndua nga incidenti”, thuhet në deklaratën e këtij shërbimi, i njohur si ISS, duke shtuar se “droni hyri në hapësirën ajrore estoneze nga hapësira ajrore ruse”.
Termocentrali në Auvere ndodhet në verilindje të Estonisë, pranë kufirit me Rusinë.
Astrid Asi, prokurorja e përgjithshme e Estonisë, tha se, bazuar në informacionin aktual, droni nuk ishte drejtuar drejt Estonisë.
“Procedurat fillestare janë duke u zhvilluar dhe hetimi do të përcaktojë rrethanat e sakta”, tha ajo në një deklaratë.
Incidenti ndodhi mes raportimeve se Ukraina kishte nisur sulme me dronë gjatë natës në portin rus të Ust-Lugës në Oblastin e Leningradit. Zyrtarët estonezë treguan se objekti që goditi Auvere ishte i lidhur me pasojat më të gjera të luftës së agresionit në shkallë të plotë të Rusisë kundër Ukrainës, dhe jo me ndonjë përpjekje të qëllimshme për të synuar Estoninë.
