Rusia ka nisur një valë të re sulmesh me dronë ndaj Ukrainës, duke vrarë katër persona dhe duke dëmtuar infrastrukturën kyçe, përfshirë objektet e prodhimit të gazit, ndërtesa banimi, një maternitet dhe portin e Odesës.
Forcat ajrore ukrainase thanë se Rusia lëshoi 273 dronë, prej të cilëve 252 u rrëzuan, ndërsa 21 goditën objektiva në 18 vende. Presidenti Volodymyr Zelensky e cilësoi sulmin si “terror të pastër kundër jetës civile”.
Guvernatori i Odesës, Oleh Kiper, raportoi dy të vdekur dhe 12 të plagosur, përfshirë një fëmijë, ndërsa viktimat e tjera u regjistruan në rajonet e Poltavas dhe Dnipropetrovsk.
