Këshilltarja Lokale e Bashkimit Evropian, Kati Schneeberger, ka reaguar sërish pas sqarimit të deklaratës së presidentit francez, Emmanuel Macron, për çështjen e vizave për kosovarët.
Përmes një postimi në platformën X [ish-Twitter], Schneeberger tha se edhe nëse kishte një gabim në përkthim, përsëri mund të dëgjohet qartë kërcënimi i Macron.
“Edhe nëse do të kishte një gabim në përkthim, kombinimi i Macron-it për liberalizimin e vizave dhe kërkesat aktuale ndaj Kosovës mbetet. Edhe sikur të mos thuhej fjalë për fjalë, përsëri mund të dëgjohet shumë qartë kërcënimi i Macron: Ne ju dhamë liberalizimin e vizave dhe tani ju duhet të përmbushni kërkesat tona. Pasoja e mospërmbushjes u komunikua kështu shumë qartë mes rreshtave”, shkroi ajo.
Diplomatja evropiane tha se sërish u paralajmëruan pasoja vetëm për Kosovën dhe asnjëherë për Serbinë.
“Dhe përsëri, bëhet fjalë vetëm për Kosovën dhe asnjëherë për Serbinë, e cila nuk ka interes të përmbushë pjesën e saj të marrëveshjes. Vuçiq aktualisht është duke lidhur kontrata me Kinën. Politika e zbutjes ndaj Vuçiqit dhe përpjekja për ta lidhur atë më shumë me BE-në dhe për ta distancuar nga Rusia dhe Kina ka funksionuar vërtet mrekullisht. A jeni i kënaqur tani?”, shkroi më tej ajo.
Even if there was a translation error, Macron's combination of visa liberalisation and the current demands on Kosovo remains.
Even if it was not said literally, one can still hear Macron's threat very clearly: We gave you visa liberalisation and now you have to fulfil our… https://t.co/vV5yIS5WK5— Kati Schneeberger 🇪🇺 (@KatiSchneeberg1) October 17, 2023
Presidenti i Francës, Emmanuel Macron, tha në Tiranë më 17 tetor se Franca bëri një “gjest besimi sa i përket çështjes së vizave për Kosovën”.
“Dua ta them një gjë me shumë qartësi. Ne kemi bërë një gjest besimi për çështjen e vizave. Sa i përket Francës, ato [vizat] janë hequr sepse ne respektojmë fjalën e dhënë. E sot, fjala nuk po mbahet. Pres një angazhim real nga këto dy autoritete [Kosova dhe Serbia] që të ecin përpara në javët e ardhshme. Ky është vetë kushti për paqe në gjithë rajonin”, deklaroi Macron.
Nga disa media në Kosovë dhe Shqipëri është raportuar se Macroni ka deklaruar në Tiranë se Franca ka suspenduar vendimin për liberalizimin e vizave.
Agjencia franceze e lajmeve, AFP, lidhur me deklaratën e Macronit në Tiranë për vizat, tha se me këtë “ai e ka kërcënuar Kosovën me zhbërjen e vendimit të vizave”.
Zbatimi i vendimit për liberalizimin e vizave për Kosovën pritet të hyjë në fuqi më 1 janar 2024.
