Administrata e Presidentit të SHBA-së, Donald Trump ka përjashtuar smartfonët, kompjuterët dhe pajisjet e tjera elektronike nga një paketë e re tarifash, duke përfshirë taksat 145 për qind për importet kineze.
Një njoftim i lëshuar sot nga Dogana dhe Mbrojtja Kufitare e SHBA-së thotë se përjashtimi do të zbatohet edhe për mallrat që kanë hyrë në vend ose kanë dalë nga magazina pas datës 5 prill.
Administrata Trump thotë se pajisjet elektronike nuk do të tatohen as sipas tarifës globale prej 10 për qind dhe as sipas normës më të lartë që zbatohet ekskluzivisht për produktet kineze.
Vendimi është marrë pas paralajmërimeve të shumta nga kompanitë amerikane të teknologjisë se rregullat e reja doganore mund të rrisin në mënyrë drastike çmimet e pajisjeve, duke qenë se shumica e tyre prodhohen në Kinë.
Shtetet e Bashkuara janë tregu kryesor për iPhone dhe Apple mbajti më shumë se gjysmën e tregut amerikan të smartfonëve vitin e kaluar, sipas Counterpoint Research.
Sipas të dhënave të tyre, 80 për qind e iPhone-ve të destinuar për tregun amerikan prodhohen në Kinë dhe 20 për qind e mbetur në Indi. Për shkak të rritjes së pasigurisë doganore, Apple dhe prodhues të tjerë, si Samsung, janë përpjekur të diversifikojnë zinxhirët e prodhimit prej vitesh duke zhvendosur një pjesë të kapacitetit të tyre në Indi dhe Vietnam.
Pas hyrjes në fuqi të tarifave të reja, Apple, sipas mediave amerikane, përshpejtoi dorëzimin e pajisjeve të prodhuara në Indi për të kompensuar një mungesë të mundshme.
Trump njoftoi tarifa drastike për mallrat nga pothuajse të gjitha vendet në fillim të kësaj jave, por papritur e ndryshoi vendimin e tij të mërkurën. Ai njoftoi se të gjitha vendet që nuk janë hakmarrë me tarifat ndaj mallrave amerikane do t’i nënshtrohen një periudhe mospagimi prej 90 ditësh, gjatë së cilës do të zbatohet vetëm një tarifë prej 10 për qind – në vend të tarifave më të larta.
Kina është e përjashtuar nga kjo masë pasi u përgjigj me kundërmasa, me tarifën e saj prej 84 për qind ndaj produkteve amerikane. Në fund, Kina iu përgjigj tarifave prej 145% të SHBA-së për importet kineze duke vendosur kundërmasa edhe më të forta, duke rritur tarifat për mallrat amerikane nga 84% në 125%.
Shtëpia e Bardhë thotë se është një mekanizëm negociues, qëllimi i të cilit është të arrijë kushte më të mira tregtare për SHBA-në. Trump pretendon se politikat e tij tarifore korrigjojnë padrejtësitë e sistemit tregtar global dhe ndihmojnë në kthimin e fabrikave dhe vendeve të punës në Amerikë.
