Të paktën 23 persona janë plagosur të premten në Izrael, pasi Irani ka lëshuar një tjetër breshëri raketash, kanë bërë të ditur shërbimet emergjente izraelite. Ndër të plagosurit rëndë janë një djalë 16-vjeçar dhe dy burra të moshës 54 dhe 40 vjeç, të cilët kanë pësuar lëndime nga copëzat e raketave.
Në qytetin verior të Karmielit, një grua ka humbur jetën pasi pësoi një atak kardiak brenda në strehimore, njoftoi shërbimi mjekësor “Magen David Adom” (MDA).
Dëshmitarët dhe paramedikët përshkruan skena të rënda në rrugët e qyteteve të goditura, me njerëz të gjakosur dhe dëme të mëdha materiale. “Dëgjuam një zhurmë të fortë dhe ndjemë një valë shpërthimi. Kur dola nga strehimorja, pashë xhamat e thyer të shtëpisë dhe shumë copa qelqi,” tha Ahmed Zidan në një deklaratë të MDA-së.
Ai shtoi se “kishte tym të dendur dhe shkatërrim të madh në ndërtesën pranë parkingut që ishte goditur nga raketa”.
Nga ana tjetër, Irani deklaroi se objektiv i sulmeve ishin “qëllime ushtarake, industri të mbrojtjes dhe qendra komanduese” në territorin izraelit, sipas një zëdhënësi të Gardës Revolucionare, transmeton media shtetërore iraniane.
