Pllakate të mëdha që përshkruajnë presidentin sirian Bashar Assad së bashku me presidentin rus Vladimir Putin me mbishkrimin “Ne mbështesim Rusinë” janë shfaqur këtë javë në Damask, ndërsa në Lindjen e Mesme shfaqen ndarje të thella mbi luftën në Ukrainë.
Putin është një mbështetës kryesor i Asadit dhe Moska ka mbështetur regjimin e tij në luftën civile të Sirisë me mijëra trupa ruse.
Pllakatet, me sa duket të ngritura nga aktivistë, tregojnë mirënjohjen dhe besnikërinë ndaj presidentit rus, ndërhyrja ushtarake e të cilit në luftën siriane në vitin 2015 në anën e forcave të Asadit ndihmoi ta kthente valën e luftës në favor të tij.
Vëzhguesit thonë se fushata e pacipë ushtarake e Rusisë në Siri dhe mosndëshkimi me të cilin u përballua, e inkurajuan Putinin.
Ata thonë se kjo i dha atij një terren të ripërtërirë në Lindjen e Mesme nga ku ai mund të pretendonte fuqinë ruse globalisht dhe i hapi rrugën sulmit të tij ndaj Ukrainës, përcjell Gazeta ‘Enigma’.
“Ne e dimë shumë mirë se kishte një sulm perëndimor në Siri dhe Rusia ishte një nga vendet që e ndihmoi Sirinë të përballej me dëshirën e Shteteve të Bashkuara për të copëtuar vendin”, tha analisti politik me bazë në Damask, Tarek al-Ahmad.
Ai sugjeroi se lufta në Ukrainë mund të dilte jashtë kufijve të Ukrainës dhe madje të arrinte në Siri.
“Unë besoj se Siria veriore mund të bëhet një front tjetër që plotëson këtë luftë”, tha ai, duke shtuar se mund të ketë beteja që përfshijnë qindra trupa amerikane që mbeten të stacionuara në Sirinë verilindore, ose ushtarë turq në veriperëndim, në rajonin e Idlib.
Pozicioni në Damask dhe zona të tjera të kontrolluara nga qeveria e vendit është në kontrast të plotë me Idlib-in e kontrolluar nga rebelët, i cili ende goditet nga sulmet ajrore ruse, ku banorët po mbështesin Ukrainën./Gazeta Enigma/
