Spanja nuk do ta njohë ndërhyrjen e Shteteve të Bashkuara në Venezuelë që shkel ligjin ndërkombëtar, tha Kryeministri Pedro Sánchez të shtunën në mbrëmje, pas arrestimit të Presidentit të Venezuelës, Nicolás Maduro nga forcat amerikane gjatë një operacioni ushtarak.
Në një postim në X, Sánchez theksoi se ndërsa Spanja nuk e kishte njohur kurrë qeverinë e Maduros, ajo gjithashtu refuzon çdo ndërhyrje të huaj që shkel normat ligjore ndërkombëtare dhe rrezikon ta zhytë rajonin në një paqëndrueshmëri më të madhe.
“Spanja nuk e njohu regjimin e Maduros. Por nuk do ta njohë një ndërhyrje që shkel ligjin ndërkombëtar dhe e shtyn rajonin drejt një horizonti të pasigurt dhe agresiv”, shkroi Sánchez.
Komentet e tij erdhën pasi Presidenti i SHBA-së, Donald Trump njoftoi se Shtetet e Bashkuara do të administronin përkohësisht Venezuelën derisa të përfundojë ajo që ai e përshkroi si një tranzicion politik “i sigurt”.
Kryeministri spanjoll gjithashtu u bëri thirrje të gjitha palëve të përfshira të japin përparësi mbrojtjes së civilëve dhe t’i përmbahen parimeve të Kartës së Kombeve të Bashkuara.
Ai bëri thirrje për një tranzicion në Venezuelë që është “i drejtë dhe i bazuar në dialog”, duke paralajmëruar se veprimet ushtarake rrezikojnë të përshkallëzojnë tensionet dhe të dëmtojnë popullsinë civile./
