Një sulm ajror izraelit ka goditur një shkollë në Gazë, të shndërruar në strehë për të zhvendosurit, duke lënë të vrarë të paktën 28 persona, përfshirë pesë fëmijë, sipas Ministrisë së Shëndetësisë së Gazës.
Ushtria izraelite ka deklaruar se sulmi kishte si objektiv grupe të Hamasit dhe militantësh të Xhihadit Islamik që ishin mbledhur në shkollë, shkruan Gazeta Enigma.
Sulmi ndodhi në shkollën Abu Hussein në kampin e refugjatëve Xhabalia, në veri të Gazës, ku Izraeli po zhvillon një operacion të gjerë ajror dhe tokësor që ka zgjatur më shumë se një javë.
Fares Abu Hamza, kreu i njësisë së emergjencave për veriun e Gazës, konfirmoi viktimat, duke shtuar se pothuajse 100 të tjerë janë plagosur. “Shumë gra dhe fëmijë janë në gjendje kritike,” tha ai për mediat.
Ushtria izraelite ka theksuar se sulmi shënjestronte një qendër komanduese që operohej nga grupet militante brenda shkollës, duke ofruar disa emra militantësh që sipas saj ishin vrarë gjatë operacionit. Megjithatë, këta emra nuk kanë mundur të verifikohen menjëherë nga burime të pavarura.
Ky sulm vjen pas përleshjeve të dhunshme që filluan më 7 tetor 2023, kur Hamasi goditi jugun e Izraelit, duke shkaktuar vdekjen e rreth 1.200 personave dhe rrëmbimin e 250 të tjerëve. Si pasojë e ofensivës izraelite, numri i palestinezëve të vrarë në Gazë ka kaluar 42.000./GazetaEnigma/
