Besnik Tahiri nga Aleanca për Ardhmërinë e Kosovës ka numëruar një sërë problemesh që, sipas tij, po rëndojnë mbi qytetarët, ndërkohë që vendi është me një Qeveri në detyrë.
Tahiri tha se Kuvendi është kthyer në arenë inatesh dhe lojërash politike, jo të vendimeve për qytetarët.
“Kryeministrit nuk i bëhet vonë, kështu i konvenon”, tha Tahiri.
Ai tutje u shpreh se viti i ri shkollor nis nesër, por ende nuk dihet se ku janë mjetet për librat, nëse janë përgatitur shkollat për nxënësit dhe nëse prindërit do të detyrohen sërish të shkojnë me borxhe në librari.
Shkrimi i tij i plotë:
“Shteti në pushim, qytetarët në hall
Viti i ri shkollor nis nesër, por ende nuk dihet ku janë mjetet për librat, a janë përgatitur shkollat për nxënës dhe prindërit prapë a rrezikojnë të shkojnë me borxh në librari?
Energjia elektrike mbetet një barrë e rëndë, e sektori privat mezi mbijeton nga çmimet e larta dhe dimri është në prag. Pyetje që do të duhej të ngritet është: A do të shtrenjtohet rryma sërish? A do të ketë subvencione? Askush nuk jep përgjigje, asnjë plan nuk shihet.
Çmimet e ushqimeve, qiraja dhe transporti rriten çdo muaj, ndërsa pagat nuk lëvizin. Vetëm justifikime, ndërkohë që ende harxhohen muaj të tëra me Gjykatën Kushtetuese e sipas gjitha gjasave do t’shkoj edhe 2025 nëpër gjykata.
Në shëndetësi, mungojnë barnat dhe personeli, reforma e shumëpremtuar ka mbetur fjalë në letër dhe çdo gjë zëvendësohet me improvizime. Sigurimi shëndetësor kërkah!
Edhe RTK, që duhet të jetë televizion publik, po shndërrohet gjithnjë e më shumë në vegël partiake, duke kontribuar në degradimin institucional e shtetëror.
E për ma zi, Kuvendi është kthyer në arenë inatesh dhe lojërash politike, jo të vendimeve për qytetarët. Kryeministrit nuk i bëhet vonë, kështu i konvenon.
Urime 1 Shtatori!”
