Të paktën 26 njerëz kanë vdekur dhe qindra mijëra të tjerë janë detyruar që të largohen nga shtëpitë e tyre, përderisa njëri nga tajfunet me të fuqishme këtë vit e përfshiu pjesën qendrore të Filipineve, thonë zyrtarët e këtij vendi.
Tajfuni ka shkaktuar vërshime në zona të mëdha, përfshirë qyteza të tëra në ishullin më të populluar qendror, Cebu, ku janë regjistruar shumica e viktimave. Raportimet lënë të kuptohet se numri i të vdekurve do të rritet, raporton BBC.
Një helikopter ushtarak, i dislokuar për të dhënë ndihmë në përpjekjet për lehtësim, u rrëzua në ishullin verior Mindanao, duke lënë të vdekur gjashtë anëtarë të ekuipazhit, tha Forca Ajrore e Filipineve.
Helikopteri u rrëzua afër qytezës Augsan del Sur në ishullin Mindanao dhe ishte në mesin e katër helikopterëve që ishin dërguar për të ofruar ndihmë.
Tajfuni që vendësit e quajnë Tino është dobësuar që nga koha kur arriti në territor tokësor në orët e para të së martës, por ka vazhduar që të sjellë erë me shpejtësi prej më shumë se 130 kilometrash në orë.
Në raportime thuhet se shumica e viktimave e humbën jetën duke u mbytur në ujë. “Situata në Cebu është vërtet e pashembullt” – tha në rrjete sociale guvernatori provincial, Pamela Baricuatro.
