Një tërmet i fuqishëm prej 7.0 shkallësh e goditi pjesën perëndimore të Haitit të shtunën, bëri të ditur Vëzhguesi Gjeologjik i ShBA-së.
Tërmeti ndodhi 8 kilometra larg qytezës Petit Trou de Nippes dhe epiqendra e tij ishte dhjetë kilometra nën sipërfaqe, njoftoi instituti amerikan.
Edhe Qendra Sizmike Evropiano-Mesdhetare tha se në atë rajon pati tërmet. Kjo qendër raportoi se fuqia e dridhjes ishte 7.6 shkallë të Rihterit, shkruan Reuters.
Sistemi për Paralajmërim për Cuname i Shteteve të Bashkuara tha se nuk ka alarm për cunami pas dridhjes së fuqishme.
Ndryshe, në janar të vitit 2010, Haiti ishte goditur nga një tërmet shkatërrues prej 7.0 shkallëve, i cili kishte lënë mbi 100.000 të vdekur e miliarda dollarë dëme materiale.
