Trajneri i Ballkanit, Ilir Daja, është paraqitur sot në konferencën për shtyp, para ndeshjes së nesërme në kuadër të kualifikimeve në Ligën e Kampionëve.
Trajneri i “portokallezinjve” tha se ndaj Zalgirisit është një ndeshje e vështirë.
“Kemi një ndeshje të vështirë. Kjo jo për faktin që ekipi kundërshtar është në vazon e parë për shkak të eksperiencës që ka nëpër kompeticionet evropiane. Është një skuadër që ka fituar disa tituj në kampionatin lituanez, në Kupa dhe Superkupa. E shton vështirësinë edhe fakti se janë në periudhë gare dhe kanë ritmin e ndeshjes sepse janë në pikun e kampionatit atje. Kanë bërë një kampionat të mirë. Gjithsesi kjo nuk do të thotë që neve do të futemi të dorëzuar, pavarësisht se është hera e parë për shumë lojtarë që marrin pjesë në të tilla kompeticione. Por, jemi përgatitur që të japim më të mirën e mundshme, sigurisht me aq kohë sa kishim në dispozicion dhe me grupin e lojtarëve që pothuajse e kemi të plotë”, tha ai.
Tutje, Daja tregoi se për ndeshjen e nesërme do të ketë disa ndryshime, por që nuk zbuloi detaje më shumë.
