Ka vdekur në moshën 88 vjeçare, Leonid Kravchuk, presidenti i parë i Ukrainës.
Andriy Yermak, kreu i zyrës së Presidentit Volodymyr Zelenskyy, konfirmoi vdekjen e Kravchuk në aplikacionin e mediave sociale Telegram pa dhënë detaje të rrethanave.
Kravchuk kishte qenë në gjendje të keqe shëndetësore dhe iu nënshtrua një operacioni në zemër vitin e kaluar, raporton Washingtonpost, transmeton Klankosova.tv.
Kravchuk udhëhoqi Ukrainën si shefi i Partisë Komuniste në vitet e fundit të Bashkimit Sovjetik dhe luajti një rol kyç në rënien e BRSS përpara se të mbante presidencën e Ukrainës nga viti 1991 deri në 1994.
Ai ishte një forcë shtytëse në shpalljen e pavarësisë së Ukrainës nga Bashkimi Sovjetik në 1991 dhe më vonë atë vit iu bashkua udhëheqësve të Rusisë dhe Bjellorusisë për të nënshkruar një marrëveshje më 8 dhjetor 1991, e cila zyrtarisht deklaroi se Bashkimi Sovjetik pushoi së ekzistuari.
Presidenti Kravchuk ra dakord të transferonte armët e mbetura bërthamore sovjetike në territorin ukrainas nën kontrollin rus në një marrëveshje të mbështetur nga Shtetet e Bashkuara.
Ai humbi zgjedhjet presidenciale të vitit 1994 nga ish-kryeministri Leonid Kuchma, ndërkaq në vitin 2020 u kthye në politikë për t’u përpjekur të negocionte një zgjidhje si pjesë e një “grupi kontakti” për konfliktin në Ukrainën lindore, ku separatistët e mbështetur nga Rusia kishin luftuar forcat ukrainase që nga viti 2014.
