Bashkimi Evropian ka miratuar sanksione të reja ndaj Rusisë, duke përfshirë një kufi të çmimit për naftën bruto ruse dhe produktet e rafinuara.
Kjo vjen si përgjigje e drejtpërdrejtë ndaj aneksimit të paligjshëm të katër rajoneve të Ukrainës.
Sanksionet e fundit, të miratuara të mërkurën në mëngjes nga ambasadorët e BE-së, paraqesin gjithashtu ndalimin e ri të eksporteve dhe importeve, si dhe një dispozitë krejt të re që do të pengonte shtetasit e BE-së të ulen në bordet drejtuese të kompanive shtetërore ruse.
Paketa e re e sanksioneve të BE-së thjesht ofron “bazën ligjore” për të mbështetur kufirin e naftës.
Përveç kufirit të naftës, raundi i ri i sanksioneve, i teti që nga fillimi i pushtimit në shkurt, vendos ndalime më të rrepta të importit për të mbajtur disa produkte ruse jashtë tregut të BE-së dhe për t’i privuar Kremlinit nga 7 miliardë euro të ardhura, sipas vlerësimeve të komisionit.
Eksportet e mallrave të prodhuara nga BE-ja, veçanërisht teknologjia kryesore e përdorur në ushtrinë ruse, si aviacioni, komponentët elektronikë dhe kimikë, gjithashtu do të ndalohen.
Lista e saktë e produkteve nuk është bërë ende publike.
Sanksionet do të hyjnë në fuqi pas publikimit të tyre në gazetën zyrtare të BE-së.
Lëndët djegëse fosile janë burimi kryesor i të ardhurave të Rusisë dhe përbëjnë 45 për qind të buxhetit federal të vendit, shkruan Euronews.
Sipas bankës qendrore të Rusisë, në vitin 2021, shitjet e naftës së papërpunuar ruse arritën në 110.2 miliardë dollarë, ndërsa produktet e rafinuara të naftës, si nafta dhe benzina, sollën 68.7 miliardë dollarë.
Vendet perëndimore duan të ulin këto të ardhura të mëdha, të cilat ata kanë frikë se po derdhen në pushtimin e kushtueshëm të Ukrainës.
Kufiri i çmimit të naftës u miratua në parim nga G7 në fillim të shtatorit dhe duhet të transpozohet në ligjin e BE-së në mënyrë që ta bëjë atë efektiv dhe të zbatueshëm.
G7 synon të ndalojë kompanitë e tyre të sigurimeve dhe transportit që të ofrojnë shërbime për cisternat ruse që shesin naftë me një çmim që tejkalon kufirin e rënë dakord.
Cisternat komerciale të naftës kanë nevojë për sigurim për të mbuluar kostot e incidenteve jashtë kontrollit të tyre, të tilla si vonesat, dëmtimet e furnizimeve, vjedhjet apo edhe lufta.
Rusia është eksportuesi më i madh i naftës në botë, duke nxjerrë nga 7 deri në 8 milionë fuçi në ditë, 60% e të cilave shkonte në Evropë. BE-ja tashmë po heq gradualisht importet e naftës ruse nën një embargo graduale.
