Organizata e Veteranëve të Luftës ka kërkuar shkarkimin e menjëhershëm të kryetarit të Kuvendit Dimal Bashës.
Kjo pasi u bënë publike hulumtimet dhe shkrimet e Bashës dhe bashkëautorësia e tij në një punim shkencor, ku degradohej Ushtria Çlirimtare e Kosovës.
E një shkresë zyrtare OVL e UÇK-së e ka dërguar sot në Kuvendin e Kosovës
Lidhur me këtë, Gazmend Syla nga OVL-UÇK, thotë fillimisht se Dimal Basha është figurë që nuk e ka marrë seriozisht.
“Ne edhe më herët e kemi njohur zotin Basha, prej që kur është bërë deputet, por edhe në kohën kur kam qenë vet në Parlament. Ka qenë ai tipi që nuk është marr seriozisht ndoshta as vet prej Lëvizjes Vetëvendosje. Pra ka qenë tip që kur ka fol s’e ka dëgjuar kush. Me ato deklaratat e tij , shpesh skandaloze, por s’kanë pas ndonjë vlerë sepse ky s’ka qenë dikush që ne me e marrë seriozisht”, thotë Syla në Kosova Today.
Derisa sa i përket zgjedhjes së kryetarit të Kuvendit, dhe hapja e rrugës për konstituim të tij, Syla thotë se është lajm i gëzueshëm, pasi Parlamenti është i vetmi institucion që mbikëqyr dhe merret me gjykimin special në Hagë.
Por, nëse Dimal Basha nuk shkarkohet, Syla thotë se do të ndiqen rrugët institucionale.
“Nuk mund të lejojmë që një njeri që e ofendon Ushtrinë Çlirimtare të Kosovës, dhe krejt sakrificën e popullit tonë, me u tall, me e fy, asnjëherë. E sidomos me ushtru punën e kryetarit të Kuvendit”, u shpreh Syla.
