Vajza 17-vjeçare, Irsa Muçollari, nga Shqipëria, vdiq tragjikisht pasi dyshohet se i dha fund jetës.
Adoleshentja mbante një ditar të shkurtër në telefonin e saj, ku shkruante kryesisht në gjuhën angleze.
Në ato pak rreshta shprehte shqetësimin për mospranimin në shoqëri, raportojnë mediat në Shqipëri.
“Dua që shoqëria të më pranojë kështu si jam. Ndryshe do detyrohem te ndërroj shoqëri. Nuk dua të me paragjykojnë për veshjen dhe sjelljen time. Unë jam kjo që jam!”
Telefoni bashkë me këto shënime është sekuestruar si provë nga Prokuroria e Gjirokastrës e cila dyshon se bullizmi në shkollë e çoi drejt vetëvrasjes 17-vjecaren.
Njoftimi i Prokurorisë së Gjirokastrës:
Vetëvrasja e të miturës I.M., në shtëpinë e saj, Prokuroria Gjirokastër regjistron procedim penal për veprën ‘Shkaktimi i vetëvrasjes’
Prokuroria pranë Gjykatës së Shkallës së Parë të Juridiksionit të Përgjithshëm Gjirokastër ka regjistruar procedimin penal për veprën penale ‘Shkaktimi i vetëvrasjes’ parashikuar në nenin 99 të Kodit Penal.
Mbi bazën e materialeve të referuara nga Komisariati i Policisë Gjirokastër, Prokuroria pranë Gjykatës së Shkallës së Parë të Juridiksionit të Përgjithshëm, Gjirokastër ka regjistruar procedimin penal nr.70, të vitit 2025 në lidhje me ngjarjen e datës 10.02.2025, ku në banesën e saj në Gjirokastër u gjet e vdekur shtetasja e mitur I. M.
Në kuadër të këtij procedimi,është ngritur grupi hetimor, i cili po kryen me prioritet të gjitha veprimet e nevojshme me qëllim zbardhjen e plotë të kësaj çështjeje, duke nisur nga pyetja e personave që kanë dijeni për veprën penale.
