Qindra opinione, gjetje e rekomandime jepen në baza vjetore nga Zyra Kombëtare e Auditimit (ZKA) për performancën e institucioneve publike dhe menaxhimin e parasë publike.
Menaxhim jo i mirë i parasë, menaxhim jo i mirë i kontratave, prokurimi publik, projektet kapitale, janë disa prej kategorive që kryen ZKA çdo vit e që vazhdimisht gjen mangësi në institucionet publike rreth menaxhimit të këtyre kategorive.
Vlora Spanca është në vitin e katërt të mandatit të saj të parë në krye të Zyrës Kombëtare të Auditimit.
Spanca vlerësoi Ministrinë e Drejtësisë si institucion që për disa vite pati një opinion të pastër.
“Është Ministria e Drejtësisë që ka opinionin e pastër, d.m.th. me vite të tëra krahasuar me ministritë e tjera, mirëpo gjithmonë duhet të kemi parasysh edhe kompleksitetin apo veprimtarinë që e ka Ministria. Në fakt edhe Ministria e Drejtësisë i ka të gjitha linjat buxhetore dhe të gjitha kategoritë, ka investime kapitale, pagesa të punonjësve, megjithatë nuk mund të them pse është dallimi në mes të Ministrisë së Drejtësisë dhe ministrive të tjera por rezultatet e tregojnë që MD ka vendosur një sistem të duhur të kontrollit të brendshëm e cila i ka parandaluar rreziqet sa i përket menaxhimit jo të mirë të financave publike si dhe ka siguruar cilësi të mirë të raportimit financiar”, tha Spanca gjatë intervistës e cila u transmetua në Kallxo Pernime.
Ajo shtoi se edhe për Ministrinë e Drejtësisë ka rekomandime, të cilat duhet t’i shqyrtojë por që në fund opinioni është i pastër.
Spanca renditi edhe disa nga ministritë që për shkak të kompleksitetit kanë opinion jo të pastër dhe kanë gjetje e rekomandime në raportet e auditimit.
“Është Ministria e Kulturës Rinisë dhe Sportit, Ministria e Arsimit, Ministria e Mjedisit, Planifikimit Hapësinor dhe Infrastrukturës për shkak se bartin edhe një buxhet shumë më të lartë se Ministria e Drejtësisë dhe kanë para vetes do të thotë aktivitete që janë të ndërlidhura me investimet kapitale”, thotë Spanca.
Ajo tha edhe se në bazë të asaj që ka nxjerrë në pah ZKA është që investimet kapitale në përgjithësi, projektet kapitale kanë mangësi të shumta qysh në fazën e planifikimit dhe pastaj këto përcillen.
“Në fakt gjetjet në përgjithësi i dimë ato dukuri, ku janë mangësitë thelbësore në sistemin e menaxhimit të financave publike dhe cilat kanë mundësi të mos menaxhohen mirë, është kryesisht fusha e investimeve kapitale dhe ajo e mallrave dhe shërbimeve dhe gjithmonë aty ku përdoren edhe procedurat e prokurimit publik”, thotë tutje Spanca.
Auditorja e Përgjithshme tregon se gjetjet e Zyrës Kombëtare të Auditimit janë edhe sistematike, edhe individuale.
“Ajo çka e karakterizon është që në vazhdimësi të njëjtat mangësi përsëriten nga viti në vit dhe kjo është më shqetësuese, kur flasim për gjetje 870 gjetje audituese janë diku 113 që i takojnë vetëm investimeve kapitale dhe dukuria të cilën e ka karakterizu ndoshta vitin 2023 është posaçërisht çështja e financimit të projekteve kapitale ku ne kemi vërejtur që posaçërisht niveli lokal ka hyrë në obligime kontraktuale, ka nënshkruar kontrata pa i zotuar, pa pasur fonde të mjaftueshme në dispozicion”, shton Spanca.
