Drejtori sportiv i Dritës, Valon Zymberi ka thënë se Drita është në bisedime me pesë trajnerë të ndryshëm për të zgjedhur se kush do të marrë drejtimin e skuadrës gjilanase.
Drita ka mbetur pa trajner pasi ndërprenë bashkëpunimin me Ardian Nuhiun, pasi u eliminuan nga Kupa e Kosovës.
Në një intervistë për Kosova Press, Zymberi ka treguar se njëri prej emrave që janë duke biseduar është edhe ish-trajneri i Malishevës, Arsim Thaçi.
“Pa diskutim, një prej emrave që e kemi kontaktuar, por janë edhe katër trajnerë tjerë të cilët i kemi kontaktuar dhe mbi këta pesë emra ne do ta bëjmë një analizë shumë të detajuar dhe në fund do ta marrim një vendim se cili do të jetë trajneri i cili do ta udhëheq Dritën në të ardhmen. Pa asnjë diskutim, këta emra të cilët i kemi future në listën e ngushtë janë trajnerë shumë të respektuar, janë trajnerë që ne kemi shumë respekt për ta dhe besojmë, por që vetëm njëri prej tyre mund të bëhet”, ka thënë Zymberi.
