Autoritetet e Hong Kongut thanë të martën se do të vrasin rreth 2,000 kafshë të vogla, duke përfshirë disa lloje brejtësish, pasi disa rezultuan pozitivë për koronavirus, në një dyqan kafshësh ku ishte infektuar edhe një punonjës.
Qyteti do të ndalojë gjithashtu shitjen e këtyre brejtësve dhe importin e gjitarëve të vegjël, sipas zyrtarëve nga Departamenti i Bujqësisë, Peshkimit dhe Konservimit. Punonjësja e dyqanit të kafshëve rezultoi pozitive për variantin Delta të hënën dhe disa lloj brejtësish të importuar nga Holanda në dyqan rezultuan pozitivë gjithashtu.
Sipas Qendrave të SHBA-së për Kontrollin dhe Parandalimin e Sëmundjeve, kafshët nuk duket se luajnë një rol të rëndësishëm në përhapjen e koronavirusit. Por autoritetet e Hong Kongut thanë se nuk po përjashtojnë transmetimin midis kafshëve dhe njerëzve.
“Ne nuk mund të përjashtojmë mundësinë që shitësi të jetë infektuar në të vërtetë nga brejtësit e vegjël,” tha Edwin Tsui, një kontrollues në Qendrën për Mbrojtjen e Shëndetit.
“Nëse zotëroni një lloj brejtësi, duhet t’i mbani ata në shtëpi, mos i nxirrni jashtë”, ka thënë drejtori i departamentit Leung Siu-fai në një konferencë shtypi.
“Të gjithë pronarët e kafshëve shtëpiake duhet të respektojnë higjienën e mirë personale dhe pasi të keni qenë në kontakt me kafshët dhe ushqimin e tyre, duhet të lani duart. Mos i puthni kafshët tuaja shtëpiake”, ka shtuar ai.
Si masë paraprake, klientët që blenë brejtës nga dyqani pas 7 janarit do të gjurmohen dhe do t’i nënshtrohen karantinës së detyrueshme dhe duhet t’i dorëzojnë ata tek autoritetet për t’u shuar, thanë zyrtarët.
Ata thanë se të gjitha dyqanet e kafshëve shtëpiake në Hong Kong duhet të ndalojnë shitjen e gjitarëve dhe se rreth 2,000 gjitarë të vegjël, do të vriten në mënyrë humane. /Gazeta “Enigma”/
