Kompania Kosovare për Distribuim të Energjisë Elektrike ka njoftuar se po vazhdon të luftojë kundër keqpërdoruesve të energjisë elektrike.
Nga KEDS kanë thënë se së fundmi disa nga aksionet e tyre në Deçan të Pejës, Krajkë të Prizrenit e Bardhosh të Prishtinës, disa konsumatorë janë zënë në flagrancë duke keqpërdorur shërbimet e energjisë.
Tutje, në komunikat thuhet se rastet që procedohen në gjykatë, rrezikojnë të dënohen deri në tri vite burg.
“Me qëllim të vendosjes së rendit dhe rregullit, të eliminimit të humbjeve dhe ofrimit të shërbimeve sa më kualitative, KEDS po vazhdon luftën ndaj keqpërdoruesve të energjisë elektrike. Ky mision po realizohet me ekipet në terren të cilët janë të pakompromis ndaj çdo konsumatori që e keqpërdor atë. Identifikimi i tyre po bëhet lehtësisht përmes sistemit të sofistikuar e të integruar në stabilimentet energjetike”
“Deçani i Pejës, Krajka e Prizrenit e Bardhoshi i Prishtinës, ishin vetëm disa nga lokacionet ku KEDS ndërmori aksione së fundmi kundër keqpërdoruesve të energjisë elektrike, ku disa konsumatorë u zunë në flagrancë duke keqpërdorur shërbimet e energjisë”, thuhet në komunikatë.
Përveç që është krizë për energji elektrike në Kosovë, sipas KEDS-it, konsumatorët që shfrytëzojnë ilegalisht shërbimet e energjisë edhe rrezikojnë sigurinë e qytetarëve.
“Përkundër krizës me të cilën po përballet vendi, një pjesë e konsumatorëve po vazhdojnë që ilegalisht të shfrytëzojnë shërbime të energjisë, duke rrezikuar jo vetëm sistemin energjetik, por edhe sigurinë e përgjithshme të qytetarëve. Shfrytëzimi i pakontrolluar i energjisë elektrike, përpos që po shkakton mbingarkesa në rrjet, po rrezikon edhe komplet infrastrukturën energjetike”, thuhet në komunikatë.
Ata thonë se, “Kjo ka bërë që KEDS të intensifikojë edhe më shumë aksionet duke organizuar kontrolle të shumta te konsumatorët e dyshuar për keqpërdorim. Ndaj tyre, përpos që po shqiptohen gjoba, por procedohen edhe për gjykatë, ku sipas ligjit në fuqi, nga kjo vepër ata rrezikojnë të dënohen deri në tre vite burg”.
“Për çdo vit, KEDS ngrit rreth pesë mijë kallëzime penale ndaj atyre që shfrytëzojnë ilegalisht shërbimet e energjisë elektrike. KEDS apelon te konsumatorët që në asnjë rrethanë të mos keqpërdorin energjinë elektrike dhe në rast se hasin në raste të tilla, të shfrytëzojnë kanalet e komunikimit përmes Qendrës së Thirrjes në 0800 791 00 apo duke na shënuar në rrjetet sociale, ku secili rast do të trajtohet me konfindencialitet të plotë. KEDS nuk do të ndalet me këto aksione deri në eliminimin e tërësishëm të kësaj dukurie”, thuhet në komunikatë. /Gazeta Enigma/.
