Një i ri nga Podujeva, Fatbardh Hyseni, u kafshua nga gjapri, i cili kishte kërkuar ndihmë në QKUK, ku edhe kishte qëndruar për disa orë, por duke mos marr ndonjë zgjidhje, e më pas u kërkua trajtim edhe në Klinikën Infektive.
I riu tregon se më pas është transferuar në Klinikën e Kirurgjisë Plastike, por nga Infektiva janë përgjigjur negativisht pasi nuk kanë pas në stok ilaçin kundër helmimit nga kafsha.
“Kam prit disa orë në Emergjencë, por askush nuk u interesojke për mu. Tani kena lyp në Infektivë. Më kanë çu edhe në Kirurgji Plastike se më ka ra të fikët. Na thanë që s’ka serum as në Infektivë”, ka deklaruar Hyseni për Gazetën Shneta.
Hyseni ka theksuar se ilaçin e kanë kërkuar edhe në Forcën e Sigurisë së Kosovës, por as atje nuk kanë gjetur zgjidhje. Më pas u detyruan të kërkojnë ndihmë në spitalin e Mitrovicës së Veriut.
“Mbrëmë kena ardh këtu dhe më kanë prit mirë. Më kanë thënë serumin dhe tani jam më mirë. Më kanë kërkuar të qëndrojë edhe sonte në spital për të më përcjellë gjendjen”, ka treguar pacienti.
Drejtori i Klinikës së Kirurgjisë Plastike në QKUK, Dr. Zejnë Buja, ka konfirmuar për Gazetën rastin e Hysenit.
Ai ka thënë se kafshimi i gjarprit është rast për Klinikën Infektive, por për shkak të gjendjes me COVID-19 është pranuar në Plastikë.
“Po e kemi pas një rast dje. Ka shkuar në Mitrovicë për shkak se në QKUK kishte mungesë të serumit”, ka thënë Buja.
Në anën tjetër nga QKUK nuk kanë dhënë sqarime në pyetjet e dërguara në lidhje me këtë rast, si dhe për mungesën e serumit në klinika.
