Dy persona, përfshirë një fëmijë katërvjeçar, kanë vdekur në bordin e një anijeje emigrantësh në brigjet e Ishujve Kanarie.
Shërbimet spanjolle të shpëtimit thanë se trupat e emigrantëve u gjetën të enjten në bordin e varkës së fryrë pranë ishullit Lanzarote, transmeton Telegrafi.
Gjithsej 51 persona kishin hipur në varkën e improvizuar nga bregu afrikan në përpjekje për të arritur në Evropë. 27 emigrantë të tjerë u gjetën në një anije tjetër aty pranë.
OJQ-të thonë se numri i grave dhe fëmijëve që përpiqen të kalojnë Oqeanin Atlantik për në Ishujt Kanarie po rritet.
Deri më tani këtë vit, 9,308 migrantë kanë mbërritur në arkipelagun spanjoll, 27 për qind më shumë se në të njëjtën periudhë të vitit 2021, sipas ministrisë së Brendshme spanjolle.
Sipas OJQ-së Caminando Fronteras, 4,404 migrantë vdiqën ose u zhdukën vitin e kaluar në det ndërsa përpiqeshin të arrinin në Spanjë, dy herë më shumë se në vitin 2020.
