Kryeministri i Kosovës, Albin Kurti pas paralajmërimeve se do të ketë krizë energjetike në gjithë Evropën, përfshirë edhe Kosovën ka thënë se janë duke punuar që të kalohet sa më lehtë.
Kryeministri i Kosovës Albin Kurti ka thënë se janë duke punuar që sezona e dimrit të jetë sa më e lehtë për qytetarët e Kosovës sa i përket mundësisë së një krize të re me energji.
Këto komente i pari i qeverisë i ka dhënë për Kosovapress, ku ka thënë se janë duke bërë gjithçka që munden në mënyrë që një krizë e re eventuale të kalohet sa më lehtë.
“Duke pas parasysh edhe gjendjen ekzistuese, të dhënat që na vinë nga shtetet dhe kompanitë e tjera, parashikimet deri diku që përpiqemi t’i bëjmë, duam që me gjithë çfarë dimë dhe mundemi t’ia kalojmë sa më lehtë dimrin 2022-2023”, ka deklaruar kryeministri Albin Kurti.
Tutje kryeministri i Kosovës, u shpreh se janë duke punuar që t’i rrisin kapacitetet e Kosovës A dhe B, në mënyrë që kur të rritet kostoja e energjisë të ketë sa më shumë prodhim vendor të energjisë.
“Sa i përket kapaciteteve ekzistuese ne po bëjmë remonte të njësive, edhe të Kosovës A dhe të Kosovës B në mënyrë që në muajt e dimrit kur kosto e energjisë është më e lartë në tregun ndërkombëtar dhe në anën tjetër kur nevojat dhe kërkesa është po ashtu më e madhe të kemi sa më shumë prodhim vendor”, u shpreh kryeministri.
Kreu i ekzekutivit po ashtu foli edhe për rezervat e qymyrit, sipas tij Kosova ende nuk është e gatshme që të heqë dorë nga qymyri në mënyrë që të ruhet ambienti.
Kurti tha kjo nuk mund të ndodh njëherë, të paktën deri sa të kalojë kriza botërore me energji.
“Ne kemi shumë qymyr, ne do të dëshironim që sa më parë të vijë një ditë kur nuk do të mund të kemi nevojë që të ndotet ambienti, mirëpo në këtë dimër dhe në një periudhë në vijim që nuk mund ta parashikojmë tani, nuk do të mund ta eliminojmë përdorimin e qymyrit për prodhimin e energjisë elektrike në vendin tonë”, ka deklaruar Kurti.
Në fund kryeministri i Kosovës tha se nuk e përjashton prapë subvencionimin e qytetarëve nëse kthehet prapë kriza me energji.
