Ministri i Mbrojtjes, Armend Mehaj, ka bërë të ditur se brenda kësaj periudhe qeverisëse janë zotuar mbi 50 milionë euro blerje armatim.
Ai ka thënë se buxheti i Ministrisë së Mbrojtjes, nën udhëheqjen e Qeverisë Kurti, gati se është dyfishuar, nga 67 milionë në 102.3 milionë euro.
“Brenda periudhës së qeverisjes së deritanishme janë zotuar mbi 50 milionë euro blerje të armatimit. Kaq buxhet për kaq ditë qeverisëse, nuk ka ndarë asnjë qeveri më herët. Buxheti i Ministrisë së Mbrojtjes ka qenë 67 milionë euro, në qeverinë tonë është rritur në 102.3 milionë”, shkroi Mehaj në Facebook.
Tutje, ai tregoi se janë rekrutuar edhe 1,240 ushtarë të rinj, dhe që, së shpejti, do të hapet edhe një tjetër konkurs. Sipas Mehajt, kjo nuk ka ndodhur me asnjë qeverisje tjetër.
“Vetëm për një vit e gjysmë kemi rekrutuar 1,240 ushtarë të rinj. Së shpejti do të hapet konkursi edhe për 612 ushtarë aktivë dhe 367 ushtarë rezervë. Kjo nuk ka ndodhur në asnjë qeverisje tjetër”.
Deklaratat e tij vijnë pas reagimit të LDK-së për mungesë të investimeve kapitale nëpër ministritë e Qeverisë Kurti. Sipas këtij subjekti politik, Ministria e Mbrojtjes po e lë ushtrinë pa armatim, pasi që ka investuar vetëm 5 për qind në investime kapitale.
