Crystal Palace nuk shkoi më shumë se një barazim 1-1 në shtëpi ndaj Brentford. Megjithatë për nga mënyra si shkoi ndeshja ky rezultat i “rri ngushtë” vendasve të cilët ishte në udhëheqje të ndeshjes ndaj Brentford me rezultatin 1-0 deri në minutën e 88-të, kur u barazuan nga Wissa.
Golin për skuadrën nga Londra e shënoi Wilfred Zaha në minutën e 59-të, me këtë të fundit që pas ndeshjes “shpërtheu” në kritika ndaj shokëve të ekipit të cilët shpërdoruan avantazhin kur kishin mbetur edhe pak minuta nga fundi i ndeshjes.
“Një moment shpërqëndrimi dhe e gjithë puna na shkoi dëm. Thjesht duhet të qëndronim dhe të duronim për disa minuta më shumë. Sapo kaluam në avantazh nisëm të mbronim, nuk e kuptoj pse e bëjmë diçka të tillë. Nëse do të vazhdonim me presion në gjysmëfushën e kundërshtarëve, besoj se do të shënonim edhe golin e dytë dhe do të dilnim nga fusha me tre pikë. Por, çfarë të them, në fund bëmë “vetëvrasje”, u shpreh Zaha.
Kujtojmë se sulmuesi 29-vjeçar është një nga emrat që mund të ndryshojë ambient në këtë fund të merkatos teksa për shërbimet e tij janë të interesuara Chelsea dhe Arsenal ndërsa pas këtyre deklaratave duket sikur Zaha po kërkon me ngulm të luajë në një skuadër më cilësore.
