Në versionin e ri të propozimit franko-gjerman për zgjidhjen e çështjes së Kosovës, nuk ka devijime nga disa parime themelore.
Në dokumentin që i është dorëzuar në fillim të kësaj jave të dyja palëve, sipas mediave serbe, Kosova merr të drejtën-njohjen ndërkombëtare, përkatësisht anëtarësimin në Këshillin e Evropës, e cila është e sigurtë, si dhe anëtarësimin në Kombet e Bashkuara, ndërsa Serbia firon Asociacionin e komunave me shumicë serbe.
Kujtojmë se në muajt e fundit nën etiketën ‘konfidenciale’ dolën disa versione të këtij propozimi franko-gjerman për normalizimin përfundimtar të marrëdhënieve ndërmjet Serbisë dhe Kosovës.
Përmbajtja e këtij dokumenti mbeti e padisponueshme për publikun, përveç informacioneve nga liderët e Bashkimit Evropian se dokumenti i është dorëzuar kryeministrit të Kosovës, Albin Kurti dhe presidentit të Serbisë, Aleksandar Vuçiq, transmeton Telegrafi.
Për dallim nga presidenti i Serbisë, kryeministri i Kosovës nuk ka pasur edhe kundërshtime të theksuara për propozimin. Ndër të tjera, ai ka theksuar se sipas asaj agjende, marrëveshja përfundimtare duhet të nënshkruhet jo më vonë se në mars të vitit të ardhshëm, që sipas interpretimit të tij do të nënkuptonte edhe njohje reciproke mes Kosovës dhe Serbisë.
Burime diplomatike të gazetës serbe “Danas” thonë se është e sigurt që në atë dokument nuk ka asnjë “shpërblim” për anëtarësimin e plotë për të dyja vendet në BE, por do të ketë para shtesë dhe fonde.
Bashkimi Evropian i ka dorëzuar Kosovës e Serbisë një draft të përditësuar të propozimit për normalizimin e marrëdhënieve Kosovë – Serbi.
Përfaqësuesi i Lartë i BE-së, Josep Borrell në Samitin e BE-së me Ballkanin Perëndimor që u mbajt në Tiranë, të martën (06.12.2022), tha, se “Teksti i fundit u është dërguar dje Beogradit dhe Kosovës dhe tashmë janë ata që duhet të nisin diskutime serioze, sepse është një moment që ka mundësi të madhe”.
Versioni i ri përmban një afat dhe përmbledhje të veprimeve që Kosova e Serbia duhet të bëjnë.
Projekt-propozimi i përditësuar është pranuar nga të dyja palët para fillimit të samitit BE-Ballkani Perëndimor në Tiranë.
