Lojtari kosovar në Galatasaray, Milot Rashica, ka folur për të kaluarën e tij në Kosovë, si dhe marrëdhëniet mes Kosovës e Shqipërisë, me Turqinë.
Rashica tha se marrëdhëniet mes Kosovës dhe Turqisë janë të ngushta dhe se njerëzit janë të ngjashëm sa i përket kulturës e ushqimit.
“Në Turqi jetojnë shumë persona me origjinë kosovare dhe shqiptare. Këtu ka edhe lojtarë kosovarë që luajnë në klube të tjera. Përveç kësaj, Turqia është një nga vendet e para që ka njohur Kosovën. Ne mbajmë një marrëdhënie të ngushtë. Ne jemi njerëz të ngjashëm; kulturat tona dhe madje edhe ajo që hamë janë shumë të ngjashme”, ka thënë Rashica në një intervistë me klubin.
Rashica tregoi edhe për historikun e tij në fillet e karrierës.
“Mendoj se kam qenë rreth gjashtë apo shtatë vjeç kur daja më ka çuar në një shkollë futbolli në Kosovë. Në Kosovë ka shumë shkolla futbolli dhe këto shkolla futbolli zakonisht themelohen nga ish-futbollistë. Shumë futbollistë vijnë nga Kosova, kështu që pas karrierës së tyre si futbollistë ata krijuan një shkollë futbolli për të promovuar të rinjtë. Kam shkuar në dy-tri shkolla të ndryshme futbolli në Kosovë. Më vonë shkova në Prishtinë, kryeqytetin e Kosovës. Kam luajtur atje për disa vite para se të kthehesha në qytetin tim të lindjes dhe të luaja për FC Vushtrria”, është shprehur 26-vjeçari.
Ylli kosovar foli edhe për transferimin në klubin turk, duke thënë se ishte e veçantë për të kur u prezantua me yjet si Mata e Icardi.
“E dija që Galatasaray ishte përpjekur të më merrte që nga fillimi i afatit kalimtar, por gjatë asaj kohe ne nuk kishim qenë në gjendje të arrinim një marrëveshje me Norëich Cityn për një tarifë transferimi. Megjithatë, një marrëveshje u arrit më vonë dy ditë para përfundimit të afatit kalimtar. Isha shumë i kënaqur që Galatasaray u përpoq të më gjente. Vazhdova të flisja me menaxherin tim, sepse doja shumë të bashkohesha me Galatasaray, një klub që është me të vërtetë popullor në të gjithë Evropën. Më në fund transferimi u përfundua dhe jam i lumtur që jam këtu në Stamboll. Ishte e veçantë për mua të prezantohesha me yje si Mata dhe Icardi dhe lojtarë të tjerë në të njëjtën ditë. Ishte një ditë e gjatë dhe emocionuese. Kontrolli mjekësor, më pas foto dhe video incizime në fanellën verdhekuqe. Ishte me të vërtetë gjithçka shumë argëtuese dhe një përvojë vërtet e bukur. Ishte gjithashtu shumë profesionale që e gjithë kjo si dhe puna e letrës u krye në kohën e duhur në të njëjtën ditë. Për të qenë i sinqertë, isha shumë i kënaqur që kushtet e përgjithshme funksionuan kaq mirë”.
