Barcelona pësoi humbje 2-1 ndaj Real Madridit në “El Clásico”, ndërsa statistikat e ndeshjes nxorën në pah vështirësitë e skuadrës së Hansi Flickut në mesfushë.
Sipas të dhënave të publikuara nga “Mundo Deportivo”, Pedri González dhe Rodri Hernández humbën nga 13 topa secili gjatë përballjes mes dy rivalëve të mëdhenj të futbollit spanjoll.
Kjo statistikë bie në sy, pasi Barcelona pritej ta kontrollonte mesfushën dhe ritmin e lojës, por madrilenët arritën t’ua vështirësonin ndjeshëm lojën katalanasve.
Pedri e pati të vështirë në pjesën e parë
Mesfushori i Barcelonës humbi 11 topa vetëm në pjesën e parë, ndërsa Rodri regjistroi shtatë humbje të topit në të njëjtën periudhë.
Megjithatë, Pedri u përmirësua pas pushimit dhe asistoi për golin e barazimit të përkohshëm të Raphinhas.
Barcelona e përfundoi ndeshjen me 62.2 për qind të posedimit të topit, kundrejt 37.8 për qind të Real Madridit. Katalanasit regjistruan edhe më shumë goditje drejt portës, 18 në total, ndërsa madrilenët tentuan 10 herë.
Real Madridi ishte më efikas
Pavarësisht epërsisë në posedim dhe numrit të pasimeve, Barcelona nuk arriti ta përkthejë dominimin në rezultat.
Sipas statistikave të golave të pritur (xG), Real Madridi regjistroi vlerën 1.95, ndërsa Barcelona 1.19, çka tregon se madrilenët krijuan raste me vlerë më të lartë për shënim.
Pedri kompletoi 78 pasime, ndërsa Rodri 84, duke qenë ndër lojtarët më aktivë në qarkullimin e topit.
Në anën tjetër, Aurélien Tchouaméni rikuperoi 11 topa, më së shumti nga të gjithë futbollistët në fushë, duke kontribuar në neutralizimin e lojës së mesfushës së Barcelonës.
Në fund, Real Madridi u tregua më efikas dhe e fitoi “El Clásico”-n me rezultat 2-1, duke marrë tri pikët përballë rivalit të përbetuar.
