Kryetari i Partisë Socialiste në Shqipëri, Edi Rama është shprehur se do të fitojnë bindshëm në zgjedhjet e 14 majit, pa bërë asgjë nga gjërat që po bëjnë, pasi kundërshtarët, sipas tij, janë nën nivelin e pritshmërive minimale të publikut shqiptar.
Rama i bëri këto komente pas mbledhjes së kryesisë socialiste, ku theksoi se janë në hapat e fundit të përgatitjeve për zgjedhjet dhe në fund të këtij muaji do të bëhet regjistrimi i kandidatëve, i listave për këshilltarët dhe nga ana tjetër, përtej këtij aspekti është dhe aspekti programatik i fushatës, specifikat e zonave të ndryshme, si dhe përmbajtja thelbësore në rrafshin kombëtar.
Sipas Ramës, ngritja e pagave është bërë që profesionistët të kenë më shumë interes dhe në këtë mënyrë të ketë shërbime më të mira shtetërore. Ai mohoi se pagat janë e pensionet po rritjet në kuadër të fushatës zgjedhore.
“Kemi bërë një hap të rëndësishëm me rritjen e pagës për mjekët specialistë, që më në fund, duke filluar nga muaji prill do të shpërblehen sipas pagave të larta të rajonit. Jemi faktikisht barazuar me Serbinë në pagë, jemi mbi Kosovën dhe në një mesatare të lartë. Të gjitha vendet tani janë pak a shumë rreth të njëjtës pagë…. Ne, për fat të mirë, nuk kemi nevojë të bëjmë gjëra të tilla për të fituar zgjedhjet. Ne zgjedhjet i fitojmë edhe pa bërë asgjë nga këto sepse e thashë; për fat të keq, kundërshtarët janë nën nivelin e pritshmërive minimale të publikut shqiptar”, ka thënë ai.
Ai është pyetur se kur do t’i zyrtarizojnë kandidatët për zgjedhjet e 14 majit.
“Pak a shumë po. Aty ku ka pasur dakordësi dhe ka pasur, si të thuash, sinkronizim rreth kandidatëve të caktuar që janë aktualisht kryetarë bashkie ka vazhduar natyrshëm procesi. Zyrtarizimi përfundimtar do të bëhet si gjithmonë, përpara se kandidatët të regjistrohen zyrtarisht, por pak a shumë, në linja të përgjithshme. E dimë se cila do jetë skuadra e kryetarëve të bashkive. Nuk flasim për emra konkretë”, ka deklaruar ai.
Derisa foli edhe për rezultatin që pret në zgjedhjet e 14 majit.
“Mendoj që do fitojmë shumë bindshëm, por për hir të vërtetës, dua të jem shumë i drejtpërdrejtë me ju. Fitorja kur ke përballë kundërshtarë të tillë, në aspektin aritmetik është minimumi. Ne duhet të shkojmë përtej fitores aritmetike sepse të hysh në fushë me kundërshtarë që nuk janë në lartësinë e duhur dhe janë deri edhe të padenjë për të qenë në fushë, nuk është e vështirë të fitosh. Çështja është të shkosh përtej fitores aritmetike dhe kjo do të thotë më shumë me njerëzit, më shumë për njerëzit sepse këto lloj situatash rrezikojnë shumë të të shkëpusin nga njerëzit sepse kur vjen puna tek fitorja aritmetike, nuk ka asnjëherë një fitore të lehtë, por gjërat nuk janë aq të vështira sa janë kur duhet të merresh me pagat, kur duhet me mbështetje më shumë për pensionistët, kur duhet të merresh me mbështetje më shumë për profesionistët, kur duhet të merresh me investime, kur duhet të merresh me ecurinë e shumë e shumë gjërave të tjera. Kjo është sfida në të cilën ne duhet të përqendrohemi shumë më tepër ndërsa politikës së gërr gërr gërrit duhet t’ia lejmë të shkuarës”, është shprehur Rama.
