Ministri i Jashtëm i Turqisë tha se dështimi i Suedisë për të parandaluar protestat e djegies së Kuranit ngre “shqetësime sigurie” në lidhje me anëtarësimin e mundshëm të vendit në NATO.
Javën e kaluar një Kuran u dogj jashtë një xhamie në Stokholm nga një refugjat irakian.
Hakan Fidan tha se Turqia do ta miratonte ende anëtarësimin e Suedisë nëse kombi “përfundon detyrat e shtëpisë” dhe vazhdon përpara me përpjekjet për të adresuar shqetësimet e Turqisë.
“Fakti që sistemi suedez i sigurisë është i paaftë të parandalojë provokimet dhe po paraqet një imazh të një vendi që sjell probleme në NATO, po na bën të mendojmë në aspektin strategjik dhe të sigurisë”, tha Fidani në një konferencë të përbashkët shtypi me homologun e tij jordanez.
Suedia dhe Finlanda braktisën neutralitetin e tyre prej dekadash dhe aplikuan për t’u bashkuar me NATO-n vitin e kaluar pas pushtimit rus të Ukrainës, shkruan Skynews.
Turqia ka vonuar ratifikimin e anëtarësimit të Suedisë, duke e akuzuar vendin se është shumë i butë ndaj grupeve që Ankaraja i konsideron si kërcënime për sigurinë e saj.
NATO dëshiron të sjellë Suedinë në grup deri në kohën kur liderët e aleancës takohen në Lituani më 11 deri më 12 korrik.
Aleanca kërkon miratimin unanim të të gjithë anëtarëve ekzistues për t’u zgjeruar.
Turqia dhe Hungaria janë të vetmet vende që nuk e kanë ratifikuar ende ofertën e Suedisë.
