Slagjana Pantoviq, zëvendëskryetarja e Komunës së Zveçanit, është pritur në një takim nga kryeministri i vendit, Albin Kurti.
Përmes një postimi në Facebook, Pantoviq ka thënë se në këtë takim është diskutuar për projektet dhe investimet e ardhshme në komunën e Zveçanit, “të cilat janë jashtëzakonisht të rëndësishme për komunën dhe qytetarët tanë në këtë kohë, si dhe për thellimin e bashkëpunimit ndërmjet komunës dhe autoriteteve qendrore në Prishtinë”, ka shkruar ajo.
Një nga temat kryesore të bisedës, sipas Pantoviq, ishte “për problemet e përditshme me të cilat ballafaqohen qytetarët e komunës sonë, si papunësia, rastet sociale, ndihma për fermerët e shumë të tjera”.
Pantoviq, falënderoi kryeministrin Kurti i cili, sipas saj, “shprehu gatishmërinë dhe dëshirën e tij të plotë për të ndihmuar zhvillimin e mëtutjeshëm të komunës së Zveçanit dhe për të takuar dhe ndihmuar qytetarët në çdo mënyrë, sepse për të qetësuar zjarrin dhe trazirat duhet të ketë bashkëpunim, besim dhe ndihmë të ndërsjellë, sepse pa besim dhe bashkëpunim nuk mund të zgjidhet asgjë, sepse me inate po e dëmtojmë veten dhe kjo nuk është në interesin tonë”.
Pantoviq është emëruar nënkryetare e Komunës së Zveçanit rreth një javë më parë, ku vendimi është nënshkruar nga kryetari i kësaj komune, Ilir Peci.
Pantoviq, funksionin do ta kryejë deri në përfundim të mandatit të kryetarit të komunës.
Ishte e vetmja kandidate nga komuniteti serb, e cila ka marrë pjesë në zgjedhjet e jashtëzakonshme lokale në katër komuna të veriut, më 23 prill.
Ajo kandidoi për kryetare të Zveçanit.
Sllagjana Pantoviqit më pas iu ofrua mbrojtje policore për shkak të kërcënimeve që mori.
