Presidentja e Kosovës, Vjosa Osmani, ka pritur në takim njoftues ministrin e sapoemëruar të Mbrojtjes, Ejup Maqedonci.
Në njoftimin e bërë për media, thuhet se presidentja Osmani e uroi ministrin Maqedonci duke i dëshiruar suksese në punë.
“Presidentja Osmani vlerësoi lartë arritjen e deritanishme në zhvillimin e Forcës së Sigurisë së Kosovës, ndërsa theksoi rëndësinë e angazhimit të mëtutjeshëm në avancimin e FSK-së në zhvillimin e plotë të kapaciteteve profesionale e operacionale në përputhje me standardet e NATO-s. Në këtë kontekst, në funksion të përmbushjes së synimeve si shtet, Presidentja Osmani siguroi se Ministria e Mbrojtjes do ta ketë gjithmonë përkrahjen e pakursyer të saj”, thuhet në njoftimin e presidencës.
Nga ana tjetër, ministri Maqedonci e falënderoi Presidenten Osmani për mbështetjen dhe u zotua se do të angazhohet maksimalisht në përmbushjen e detyrave.
Maqedonci u emërua ministër i ri i Mbrojtjes, pas dorëheqjes së Armend Mehajt nga ky post.
