Numri i rasteve të dhunës në familje ka marrë përmasa shqetësuese në vendin tonë, pasi çdo ditë persona të ndryshëm përfundojnë në pranga si të dyshuar për dhunë ndaj familjarëve. Këto raste bëhen edhe më të rënda, kur viktima janë prindërit të cilët përjetojnë dhunë psikike e fizike nga fëmijët e tyre.
Një rast i tillë ka ndodhur në një familje në Prizren, ku djali dyshohet se ka ushtruar dhunë ndaj prindërve të tij.
Sinjali mëson se çifti ka kërkuar ndihmën e Policisë, ku kanë deklaruar se 31-vjeçari vazhdimisht po i kërcënon që t’i japin para.
Njësitë policore kanë dalë në vendin e ngjarjes ku kanë arrestuar të dyshuarin, të cilit iu gjet dhe sekuestrua një thikë.
Me urdhër të prokurorit, i riu është dërguar në mbajtje dhe do të hetohet nën dyshimet për kryerjen e veprës penale ‘Dhunë në familje’.
