Eurodeputeti gjerman, Reinhard Butikofer, ka kritikuar përfaqësuesin e lartë të BE-së, Josep Borrell, pasi sipas tij, ai po fajëson njësoj Kosovën dhe Serbinë edhe pas sulmit të agresionit serb.
Deputeti gjerman i Parlamentit Evropian, Reinhard Butikofer, ka komentuar deklaratat e Josep Borrell, përfaqësuesit të lartë të Bashkimit Evropian për politikë të jashtme, pas bisedimeve në Bruksel mes Kosovës dhe Serbisë.
Butikofer është shprehur i shqetësuar duke thënë se Borrell po i fajëson të dyja palët në mënyrë të barabartë duke mos kujtuar aktin e agresionit serb të 24 shtatorit.
Pas takimit të mbajtur në Bruksel të enjten, Borrell kishte theksuar se Kosova dhe Serbia nuk kanë treguar gatishmëri për të pajtuar me propozimin e ri evropiano-amerikan për themelimin e Asociacionit të Komunave me shumicë serbe.
Ndërsa, deputeti gjerman ka theksuar se Asociacioni ishte e vetmja pengesë për normalizimin e marrëdhënieve që Borrell ka përmendur, ndërsa nuk është diskutuar për parakushtet që mund të kishte pala serbe.
Butikofer gjithashtu ka kujtuar publikisht se kryeministri i Kosovës, Albin Kurti, pas takimeve ka shprehur gatishmërinë për të pranuar çdo propozim të BE-së, ndërsa presidenti serb, Aleksandër Vuçiq, ka refuzuar një gjë të tillë.
Në deklaratën e tij në platformën X, deputeti gjerman ka theksuar edhe faktin se Parlamenti Evropian ka kërkuar heqjen e sanksioneve ndaj Kosovës, por ky aspekt nuk është diskutuar në bisedat aktuale.
“Kjo është vërtet interesante: 1. E vetmja pengesë, e cila Borrell përmend, është Asociacioni. A nuk kishte pengesa nga pala serbe? A është e drejtë të “harrohet” përmendja e të gjitha akteve të fundit të agresionit serb? 2. Kryeministri Kurti tha publikisht se ishte i gatshëm të firmoste gjithçka që BE-ja vendosi në tryezë, ndërsa Vuçiq refuzoi një gjë të tillë”.
“Pra, pse atëherë bën Borrelli fajëson të dyja palët në mënyrë të barabartë? 3. A i kujtohet Borrellit që Parlamenti Evropian kërkoi heqjen e sanksioneve ndaj Kosovës? Pse nuk flitet për këtë? Sa shumë pyetje”, ka shkruar Butikofer.
Ndërkaq, Borrell ka thënë se mosthemelimi i Asociacionit të Komunave me shumicë serbe në veri të Kosovës është një pengesë e madhe në rrugën drejt normalizimit.
Borrelli ka bërë thirrje që palët të angazhohen sinqerisht në procesin e normalizimit, duke theksuar se kjo mund të ndodhë vetëm përbrenda kornizës së dialogut.
Ai ka insistuar se dialogu është e vetmja rrugë për të përparuar në rrugën evropiane dhe për të shmangur ngritjen e reja të dhunës.
