Të dielën pasdite një person ka vdekur në një qendër masazhi në lagjen “Arbëria” në Komunën e Prishtinës.
Sipas Paparacit, viktima i moshës 51-vjeçare është shtetas i Serbisë.
Pas marrjes së informatës, njësitet policore kanë shkuar menjëherë në vendngjarje, ndërkaq ekipa emergjente ka konstatuar vdekjen e tij.
Siç mëson Paparaci nga burimet e veta, në bazë të asaj se çfarë kanë thënë dëshmitarët, “gjatë ofrimit të shërbimit të masazhës viktima kishte pasur vështirësi në frymëmarrje”.
Në lokacionin e qendrës së masazhit “Queen Massage” kanë dalë edhe njësitet tjera relevante, dhe me urdhër të prokurores rasti është duke u hetuar si “hetim mbi vdekjen”.
Ndërsa trupi i pajetë i viktimës është dërguar në Institutin e Mjekësisë Ligjore për kryerjen e autopsisë.
Ky ekzaminim do të përcaktojë shkaqet e sakta të vdekjes dhe do të ndihmojë në kryerjen e hetimeve.
