Zëvendëskryeministri, Besnik Bislimi, ka mirëpritur Drejtorin e Ekipit Ekonomik Gjerman, Ricardo Gjucci.
Përmes një komunikate për media, thuhet se takimi u fokusua në ecurinë zhvillimore të vendit dhe indikatorët ekonomikë, raporton Enigma.
Tutje, thuhet se Bislimi ka potencuar se bazuar në indikatorët ekonomikë, është vërejtur zhvëillimi i Kosovës, teksa e ka cilësuar si histori suksesi.
“Bashkëbisedimi u fokusua në ecurinë zhvillimore të vendit dhe indikatorët ekonomikë. U theksua rritja ekonomike që ka njohur Kosova në tri vitet e fundit, rritja e investimeve të huaja direkte duke qenë më e larta në rajon, rritja e të hyrave, krijimi i vendeve të reja të punës e ulja e inflacionit mes tjerash. Zëvendëskryeministri tha se bazuar në krejt indikatorët ekonomikë, që japin pasqyrën e situatës ekonomike në vend, vërejmë se zhvillimi i Kosovës është një histori suksesi dhe unike, teksa Dr. Giucci tha se të gjithë këta indikatorë pozitivë shfaqin një tendencë dhe dinamikë pozitive e të fuqishme për zhvillimin, të tashmen e të ardhmen e vendit. Ai vlerësoi politikat ekonomike të ndërmarra nga qeveria dhe zhvillimin e hovshëm ekonomik që po njeh vendi”, thuhet në komunikatë.
Më tej, u bë e ditur se në takim u diksutua edhe për rëndësinë e benefitet e Tregut Unik të Pagesave në Euro.
