Kryeministri i Shqipërisë, Edi Rama, dhe Zëvendëskryeministrja, Belinda Balluku, ministrja e Infrastrukturës dhe Energjisë, zhvilluan një takim me Presidentin e Azerbajxhanit, Ilham Aliyev, ku nënshkruan një memorandum bashkëpunimi për projektin e gazifikimit të qytetit të Korçës.
Ky marrëveshje ka si qëllim përmirësimin e infrastrukturës energjetike në Shqipëri dhe zgjerimin e rrjetit të gazit natyror, duke kontribuar në forcimin e lidhjeve energjetike ndërmjet të dy vendeve, shkruan Gazeta Enigma.
Nënshkrimi i këtij memorandumi hap mundësi për një zhvillim të qëndrueshëm dhe rritje të cilësisë së jetës për qytetarët e Korçës.
“Është një lajm shumë i mirë ky, i cili është ngjizur prej kohësh midis Albgazit dhe SOCAR, por tashmë po bëhet realitet. Planet tona janë që të nisim sa më parë nga puna, duke nisur me pjesën inxhinierike. Parashikohet që puna të nisë në 2025 për të përfunduar në 2027. Synojmë të krijojmë një rrjet të tërë shpërndarjeje që të mbulojë të gjithë qytetin, por edhe në bizneset e qytetit”, u shpreh Balluku pas firmosjes së marrëveshjes.
Sipas ministres, projektet për gazifikimin e vendit do të vazhdojë deri në vitin 2030.
“Sa më shumë të rritet plani për gazifikimin e Shqipërisë, aq më shumë ulen kostot. Në fillim, shteti do ta mbështesë këtë procedurë të re, këtë produkt të ri, duke e zgjeruar më pas edhe në zonën e Pogradecit dhe Ersekës. Ne parashikojmë që ky gazifikim i vendit të vazhdojë deri në vitin 2030, duke mbuluar pjesën më të madhe të qyteteve, të cilat kanë edhe pjesë industriale”.
E kryeministri Rama dha më shumë detaje nga marrëveshja.
“Sot në Azerbajxhan ku nënshkruam memorandumin e bashkëpunimit mes Ministrisë së Infrastrukturës dhe Energjisë, Albgazit dhe kompanisë shtetërore të naftës në Azerbajxhan, SOCAR, për zhvillimin e infrastrukturës së gazifikimit të qytetit të Korçës dhe marrëveshjen e Korporatës Elektroenergjetike Shqiptare (KESH) dhe gjigandit energjetik të Emirateve të Bashkuara, Masdar, për krijimin e kompanisë së përbashkët publike që do të investojë në Shqipëri e në rajon në mjediset e Samitit Botëror për Klimën, Cop 29”, tha Rama në një postim në Facebook./GazetaEnigma/
