Sekretari i Përgjithshëm i NATO-s, Mark Rutte, është pyetur në Bruksel në lidhje me tarifat e reja të vendosura nga Shtetet e Bashkuara të Amerikës dhe ndikimin e tyre në ekonominë e vendeve aleate.
Por, ai ka refuzuar të japë komente konkrete për këtë çështje.
Rutte ka theksuar se është “i fokusuar ‘me lazer’ për t’u siguruar që territoret e NATO-s të jenë të sigurta”.
Ai ka shtuar se kërcënimi më i madh dhe i qëndrueshëm për aleancën është Rusia.
“Nga kjo, ne e kuptojmë se është një kërcënim afatgjatë, i qëndrueshëm dhe i pakëndshëm, dhe kjo është Rusia. Ky duhet të jetë fokusi ynë. Prandaj, nuk po komentoj për tarifat,” ka thënë ai.
I pyetur nëse tarifat e vendosura nga Donald Trump po ndikojnë në rritjen e inflacionit dhe po pengojnë vendet të shpenzojnë më shumë për mbrojtje, Rutte tha: “Kjo është për politikën kombëtare dhe politikanët që duhet të lundrojnë dhe kjo është ajo që ata po bëjnë”.
“Unë nuk mendoj se po e ndihmoj këtë aleancë duke komentuar diçka që nuk është në të vërtetë pjesë e politikës së aleancës dhe kjo është të sigurohemi që ne mund të mbrohemi”, tha tutje Rutte.
