Seanca konstituive e Kuvendit të Kosovës ka nisur, pas një ore vonesë.
Seanca po kryesohet nga Avni Dehari – deputeti më i vjetër në moshë -, së bashku me deputeten Sala Jashari, që është deputetja më e re në moshë e legjislaturës së nëntë.
Tashmë është themeluar Komisioni për Verifikimin e Mandateve, ky komision udhëhiqet nga LVV-ja, partia fituese e zgjedhjeve.
Artan Abrashi është deputeti i zgjedhur i LVV-së, anëtar i këtij komisioni; Përparim Gruda nga PDK-ja; Armend Zemaj nga LDK-ja, Branislav Nikoliq nga Lista Serbe, Time Kadrijaj nga AAK, etj.
Formimi i këtij komisioni është pika e parë e rendit të ditës të seancës konstituive të Kuvendit.
Në sallë janë të pranishëm 119 deputetë, të cilët votuan për krijimin e këtij komisioni të përkohshëm.
